Абай облысында есірткі қылмысына қарсы іс-қимыл басқармасының қызметкерлері «Есірткісіз қала» акциясы аясында салауатты өмір салтын насихаттауға бағытталған ауқымды спорттық іс-шара ұйымдастырды. Аталған бастама қоғамда есірткіге қарсы иммунитет қалыптастыруды күшейтіп, жастарды зиянды әдеттерден алшақтатуға және бұқаралық спортты дамытуға серпін беруді көздейді.
Акция шеңберінде волейболдан облыстық, қалалық және аудандық деңгейде жарыстар өткізілді. Спорт додасына әртүрлі мекемелер мен ұйымдардың командалары, сондай-ақ аудан-қалалардан келген жас және тәжірибелі спортшылар белсене қатысты. Жарыс жоғары деңгейдегі ұйымдастырумен, тартысты әрі әділ ойын барысымен ерекшеленді.
Алаң төрінде командалар тек спорттық шеберліктерін ғана емес, сонымен қатар бірлік, төзімділік, командалық рух пен жеңіске деген жігерін де айқын көрсетті. Әрбір ойын көрермендерге ерекше әсер сыйлап, салауатты өмір салтының маңызын тереңірек ұғындыруға ықпал етті.
Қатысушылар өзара тәжірибе алмасып, спорт арқылы достық пен ынтымақтастықты нығайтты.
Іс-шараның негізгі мақсаты – қоғамда, әсіресе жастар арасында есірткіге қарсы тұрақты көзқарас қалыптастыру, зиянды әдеттердің алдын алу және дені сау ұлт тәрбиелеу. Сонымен қатар мұндай спорттық бастамалар бұқаралық спортты дамытуға, азаматтардың бос уақытын тиімді ұйымдастыруға және әлеуметтік белсенділікті арттыруға бағытталған.
Ұйымдастырушылардың айтуынша, «Есірткісіз қала» акциясы алдағы уақытта да жалғасын тауып, түрлі спорттық және мәдени шаралар арқылы кеңінен насихатталатын болады. Бұл бастама – қоғамның қауіпсіздігі мен болашағы үшін маңызды қадамдардың бірі. Жарыс қорытындысы бойынша үздік деп танылған командалар арнайы дипломдармен және алғыс хаттармен марапатталды.
Жауап қалдыру Жауапты болдырмау