Суши, пицца, донер, шаурма және басқа да жылдам дайындалатын тағамдар бүгінде күнделікті өміріміздің ажырамас бөлігіне айналды. Дегенмен дайын тағамдар мен жеткізу қызметтеріне сұраныстың артуымен бірге қоғамдық тамақтану кәсіпорындарының өнімнің сапасы мен қауіпсіздігін қамтамасыз ету жауапкершілігі де күшейе түсуде. Осы өзекті мәселелерге Ақмола облысының Санитариялық-эпидемиологиялық бақылау департаменті ұйымдастырған семинар арналды.
Семинарға «Атамекен» Ұлттық кәсіпкерлер палатасының өңірлік палатасының өкілдері, суши, ролл, пицца, донер және шаурма дайындаумен, өткізумен және жеткізумен айналысатын қоғамдық тамақтану кәсіпорындарының иелері мен қызметкерлері, дайын тағамдарды жеткізу қызметтерінің өкілдері, сондай-ақ Көкшетау қалалық санитариялық-эпидемиологиялық бақылау басқармасының мамандары қатысты.
Семинарды аша отырып, Департамент басшысының орынбасары Сәуле Садвақасова дайын тағамдар мен оларды жеткізу қызметтеріне деген сұраныс жыл сайын артып келе жатқанын атап өтті. Осыған байланысты бизнес өкілдерінің өнімнің сапасы мен қауіпсіздігі үшін жауапкершілігі де күшейе түсетінін айтты. Ол тағамды дайындаудан бастап тұтынушыға жеткізгенге дейінгі барлық кезеңде санитариялық талаптарды сақтау тағамнан уланудың алдын алудың негізгі шарты екенін ерекше атап өтті.
Кездесу барысында қатысушылар тағамнан уланудың жиі кездесетін себептерін, олардың алдын алу шараларын, сондай-ақ қоғамдық тамақтану объектілеріне қойылатын негізгі санитариялық-эпидемиологиялық талаптарды талқылады.
Рұқсат беру құжаттарын алу тәртібі және санитариялық-эпидемиологиялық талаптарды сақтау мәселелері бойынша Көкшетау қалалық басқармасының бөлім басшысы Руслан Искаков баяндама жасады. Ол заңнама талаптарын жан-жақты түсіндіріп, кәсіпкерлердің сұрақтарына жауап берді және мемлекеттік бақылау барысында жиі анықталатын заң бұзушылықтарға назар аударды.
Ақмола облысының Санитариялық-эпидемиологиялық бақылау департаменті қоғамдық тамақтану объектілерінің иелерін санитариялық талаптарды қатаң сақтауға, өндірістік бақылауды жүйелі түрде жүргізуге және шығарылатын өнімнің жоғары сапасын қамтамасыз етуге шақырады. Өйткені әрбір дайын тағамның қауіпсіздігі – ең алдымен өндірушінің жауапкершілігі әрі тұтынушылар денсаулығының кепілі.
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1248915?lang=ru
Жауап қалдыру Жауапты болдырмау