Елорда күніне орай 4 шілдеде Астанада қазақ халқының көне ұлттық сайыстарының бірі – «Жілік сындырудан» республикалық чемпионат өтеді, деп хабарлайды қала әкімдігінің ресми сайты.
Жарыс Астана қаласының Баршын көшесі, 30/2 мекенжайында орналасқан «Ұлытау» спорттық-сауықтыру кешенінде ұйымдастырылады. Чемпионаттың салтанатты ашылу рәсімі сағат 11:00-де басталады.
Байрақты бәсекеге Павлодар, Ақмола және Солтүстік Қазақстан облыстарының, сондай-ақ Астана қаласының спортшылары қатысады. Бұдан бөлек, Қазақстан Республикасы Ішкі істер министрлігі, Төтенше жағдайлар министрлігі және Қарулы күштерінің командалары да өзара мықтыны анықтайды.
Әртүрлі жас санатындағы қатысушылар күш-қайраты, төзімділігі мен шеберлігін сынға салады. Жарысқа тіркелу чемпионат өтетін күні сағат 10:00-ден бастап өткізіледі.
«Жілік сындыру» – ұрпақтан ұрпаққа жалғасып келе жатқан қазақ халқының көне ұлттық сайыстарының бірі. Сайыстың мақсаты – тек қолдың күші мен дұрыс әдіс-тәсілді пайдалана отырып, жілікті сындыру. Бұл дода қатысушылардан зор күш-қуатты, төзімділікті және жоғары дайындықты талап етеді.
Чемпионат қорытындысы бойынша жеңімпаздар мен жүлдегерлер дипломдармен және бағалы сыйлықтармен марапатталады.
Ақпарат көзі : https://www.gov.kz/memleket/entities/astana/press/news/details/1253144?lang=ru
Жауап қалдыру Жауапты болдырмау