Қазығұрт аудандық мәдениет сарайында «№11 колледж» МКҚК-ның дәстүрлі «Ақ жол, жас түлек – 2026» атты үздік және белсенді бітіруші түлектерге диплом табыстау салтанаты өтті.
Салтанатты шараға Қазығұрт ауданы әкімінің орынбасары Мұхамедғали Әшірбаев, зиялы қауым өкілдері, өңір кәсіпкерлері, оқу орнының ардагер ұстаздары мен танымал түлектері қатысты.
Жиында аудан әкімінің орынбасары Мұхамедғали Әшірбаев бітіруші түлектерді өмірлеріндегі маңызды белеспен құттықтап, алған білімдерін ел игілігі жолында пайдаланып, білікті маман болып қалыптасуларына және алдағы өмірлеріне толағай табыс пен сәттілік тіледі.
Салтанатты рәсім барысында колледждің 200 үздік және белсенді түлегіне дипломдар табысталды.
Мерекелік кеш концерттік бағдарламамен жалғасып, белсенді түлектер ән айтып, би билеп, өнерлерін ортаға салды. Әсерлі кеш көтеріңкі көңіл күймен аяқталып, түлектердің жүрегінде ұмытылмас естелік болып қалды.
Айта кетейік, Қазығұрт ауданындағы «№11 колледж» мемлекеттік коммуналдық қазыналық кәсіпорны «Тігін өндірісі және киімдерді үлгілеу», «Ауыл шаруашылығын механикаландыру», «Тамақтандыруды ұйымдастыру», «Дәнекерлеу ісі», «Автокөлікке техникалық қызмет көрсету және пайдалану» мамандықтары бойынша білікті мамандар даярлайды.
Ақпарат көзі : https://www.gov.kz/memleket/entities/turkestan-kazygurt-audany/press/news/details/1253154?lang=kk
Жауап қалдыру Жауапты болдырмау