Пастереллез инфекциясының алдын алу

Пастереллез – Pasteurella туысына жататын бактериялар қоздыратын жануарлар мен адамдардың жұқпалы ауруы. Аурудың ең жиі кездесетін қоздырғышы – Pasteurella multocida. Бұл бактериялар көптеген үй және жабайы жануарлардың жоғарғы тыныс алу жолдары мен ауыз қуысының қалыпты микрофлорасының құрамына кіреді. Олар көбінесе мысықтарда, иттерде, ірі және ұсақ қара малда, шошқаларда, қояндарда және құстарда кездеседі.

 

Жануарларда пастереллез тыныс алу мүшелерінің зақымдануын, сепсисті, буындар мен ішкі ағзалардың қабынуын тудыруы мүмкін. Адамдарда ауру көбіне жануарлардың тістеуі, тырнауы немесе ауру жануармен тығыз байланыста болғаннан кейін дамиды.

 

Көп жағдайда инфекция тері мен жұмсақ тіндерді зақымдайды, алайда дер кезінде емделмесе сүйектердің, буындардың, өкпенің қабынуына және қанның жалпы инфекциясына (сепсиске) әкелуі мүмкін. Инфекцияның негізгі көзі – ауру жануарлар немесе бактерия тасымалдаушы сау жануарлар.

 

Инфекция берілуінің бірнеше негізгі жолдары бар:

 

– қатынастық жол – ең жиі кездесетін берілу жолы. Инфекция жануар тістегенде, тырнағанда, зақымданған теріге сілекей түскенде немесе ашық жараға жануардың сілекейі тигенде жұғады;

 

– ауа-тамшы жолы – негізінен жануарлар арасында тығыз жағдайда ұсталған кезде кездеседі және шаруашылықтарда аурудың таралуына ықпал етеді;

 

– алиментарлық жол – ластанған тағамды немесе суды пайдалану арқылы жұғуы мүмкін, бірақ адамдарда өте сирек кездеседі;

 

–  зақымданған тері және шырышты қабықтар арқылы – бактериялар кесілген, сызылған немесе басқа да жарақаттар арқылы ағзаға енеді;

 

– кәсіби жолмен жұқтыру – ветеринариялық дәрігерлер, мал шаруашылығы қызметкерлері, ет комбинатының жұмысшылары, хайуанаттар бағы мен жануарлар панасының қызметкерлері жоғары қауіп тобына жатады.

 

Пастереллездің алдын алу жануарлар мен адамдардың инфекцияны жұқтыруының алдын алуға негізделген.

 

Ветеринариялық профилактика:

 

– жануарларды ветеринариялық дәрігердің тұрақты тексеруі;

 

– ауру жануарларды дер кезінде анықтау, оқшаулау және емдеу;

 

– қолайсыз шаруашылықтарда ветеринариялық қызметтің ұсынысы бойынша жануарларды вакцинациялау.

 

– адамдарға арналған жеке профилактика:

 

– ауру жануарлармен байланыстан аулақ болу;

 

–  жануарлармен байланыстан кейін қолды сабындап мұқият жуу;

 

– жануар тістеген немесе тырнаған жағдайда жараны көп мөлшердегі сумен және сабынмен дереу жуу, антисептикпен өңдеу және дәрігерге қаралу.

 

– санитариялық-гигиеналық шаралар:

 

– мал шаруашылығы кәсіпорындарында ветеринариялық бақылауды қамтамасыз ету;

 

– жемшөп пен ауыз судың сапасын бақылау;

 

– өлген жануарларды ветеринариялық талаптарға сәйкес уақытылы жою;

 

– инфекция ошағы анықталған кезде дезинфекция жүргізу;

 

– халық пен мал шаруашылығы қызметкерлері арасында санитариялық-ағарту жұмыстарын жүргізу.

Ақпарат көзі : https://www.gov.kz/memleket/entities/departament-kkbtu-almaty/press/news/details/1257628?lang=ru