ҚР ДСМ медициналық және фармацевтикалық бақылау Комитетінің Ұлытау облысы бойынша департаменті дәрілік заттар (ДЗ) мен медициналық бұйымдарды (МБ) жою қағидаларын қатаң сақтау қажеттігі туралы хабарлайды

Қазақстан Республикасы Денсаулық сақтау министрі міндетін атқарушының 2020 жылғы № ҚР ДСМ-155/2020 бұйрығымен бекітілген талаптарға сәйкес келесілерді сақтау қажет:

🔹 Кім және қалай жояды?

• 300 қаптамаға (данаға) дейін – жоюды субъектінің өзі жүзеге асырады. Ол үшін ұйым басшысы тұрақты жұмыс істейтін комиссияның құрамын (кемінде 3 адам) бекітеді.
• 300 қаптамадан (данадан) астам – жою рәсімі шарт негізінде тек мамандандырылған ұйым арқылы жүзеге асырылады.
• Маңызды: Екі жағдайда да Қазақстан Республикасының экологиялық және санитариялық-эпидемиологиялық заңнамасының талаптары қатаң сақталуға тиіс.

🔹 Мерзімдері және сақтау тәртібі

• Жоюға дейін жарамсыз өнімдер (ақаулы, жарамдылық мерзімі өткен, жалған дәрілік заттар мен медициналық бұйымдар) арнайы қорғалған жерде оқшауланып сақталуы және «Тиісті шаралар қабылданғанға дейін өткізуге жатпайды» деген таңбамен белгіленуі тиіс.
• Жою рәсімі жарамсыз өнімдердің жиналуына қарай, бірақ тоқсанына кемінде бір рет, комиссияның қатысуымен және есепті тоқсаннан кейінгі айдың 10-күнінен кешіктірілмей жүргізіледі.

🔹 Жою актісін рәсімдеу

1. Жою актісі бекітілген нысан бойынша жою жүргізілген күні ресімделеді.
2. Актінің бір данасы бес жұмыс күні ішінде міндетті түрде аумақтық департаментке жолданады.

⚠️ Аталған талаптарды бұзу Қазақстан Республикасының заңнамасына сәйкес жауапкершілікке әкеп соғады.

Дәрілік заттар мен медициналық бұйымдарды жою рәсімінің белгіленген тәртіпке сәйкес жүргізілуін қатаң бақылауды және есептіліктің уақтылы ұсынылуын сұраймыз.

Ақпарат көзі : https://www.gov.kz/memleket/entities/dkmfk-ulytau/press/news/details/1258513?lang=ru