Жетісу облысы құрылғаннан бері өңірдегі республикалық маңызы бар автомобиль жолдарының 100%-ы жөндеуден өтті.

Жетісу облысы құрылғаннан бері өңірдегі республикалық маңызы бар автомобиль жолдарының 100%-ы жөндеуден өтті. Сонымен қатар, қазіргі уақытта облыстық маңызы бар 150 шақырым жолға және облыстың 38 елді мекеніндегі 230 шақырым көшеге жөндеу жұмыстары жүргізілуде.

Көлік инфрақұрылымын жаңғырту аясында облыстық маңызы бар «Жансүгіров – Ақсу» автожолында (ұзындығы 30 км) орташа жөндеу жұмыстары қарқынды жүргізілуде. Айта кетейік, бұл жол учаскесінде соңғы 30 жыл бойы жөндеу жұмыстары мүлде жүргізілмеген болатын. Облыстық бюджет есебінен қаржыландырылған жоба 2024 жылы басталды.

«Жансүгіров – Ақсу» жолындағы жұмыс барысы:

* Жоспарланған 13 су өткізу құбыры толық орнатылып, пайдалануға дайын.
* Бүгінгі таңда 11 шақырымға асфальт төселіп, жол жиектерін нығайту жұмыстары жүргізілуде.
* Қалған 20 шақырымды асфальттау ағымдағы жылдың қазан айының соңына дейін аяқталып, қараша айында жол толық пайдалануға беріледі.

Айдос Досжанов, басқарма басшысының орынбасары:

«Биыл Ақсу ауданы бойынша барлығы 40 шақырымға жуық жол жөндеумен қамтылды. Атап айтқанда, «Ақсу – Қаракөз» автожолы мен Ақсу ауылынан Ойтоған ауылына дейінгі 20 шақырымдық жолды жөндеу басталды. Бұл нысандар келесі жылы пайдалануға беріледі.»

Облыстағы өзге де маңызды жобалар:

* Өңірдегі республикалық маңызы бар автомобиль жолдарының 100%-ы (соның ішінде «Талдықорған – Үшарал – Достық» және «Сарыөзек – Көктал» бағыттары) толық жөндеуден өтті.
* «Алматы – Талдықорған» автожолы (21 км учаскесі): күрделі жөндеу жұмыстары биылғы жылдың соңына дейін аяқталады.
* «Талдықорған – Үштөбе» автожолы (40 км учаскесі): орташа жөндеу жұмыстары биылғы қыркүйек айында аяқталады.
* Алматы облысының шекарасынан Талдықорғанға дейінгі жол (158 км): қаланың айналма жолын қамтитын бұл ауқымды нысан 2027 жылдың соңына дейін толық қайта жаңғыртылады.

Биылғы жылдың қорытындысы бойынша облыстық маңызы бар автомобиль жолдарының жақсы және қанағаттанарлық жағдайдағы үлесі 96%-ға жетіп, республика бойынша ең жоғары көрсеткіштердің бірін құрайтын болады.

Ақпарат көзі : https://www.gov.kz/memleket/entities/zhetysu-alakol-kabanbai/press/news/details/1258074?lang=ru