Елордада республикалық «Қауіпсіз жол» жедел-профилактикалық іс-шарасы аясында жол қозғалысы қауіпсіздігін қамтамасыз ету бағытындағы жұмыстар жүйелі түрде жалғасуда. Ерекше назар мопед, электрлі велосипед жүргізушілері мен жаяу жүргіншілердің жол қозғалысы ережелерін сақтауына аударылуда.
Полиция қызметкерлері күн сайын рейдтік және профилактикалық іс-шаралар өткізіп, жол қозғалысына қатысушыларға заңнама талаптарын және оларды бұзғаны үшін көзделген жауапкершілікті түсіндіруде. Ең жиі анықталатын құқық бұзушылықтардың қатарында тіркелмеген мопедтер мен электрлі велосипедтерді пайдалану, жүргізуші куәлігінсіз басқару, мемлекеттік тіркеу нөмірінің болмауы, сондай-ақ жол белгілері, бағдаршам сигналдары мен Жол қозғалысы қағидаларының өзге де талаптарын сақтамау бар.
Жедел-профилактикалық іс-шара басталғалы бері 40-қа жуық тіркелмеген көлік құралы анықталды. Олардың барлық иелері қолданыстағы заңнамаға сәйкес әкімшілік жауаптылыққа тартылды.
Полиция департаменті көлік құралдарын уақтылы тіркеу, заңнама талаптарын сақтау және жолда жауапкершілік таныту – жол қауіпсіздігінің басты кепілі екенін еске салады. Жол қозғалысы қағидаларын бұзу жүргізушінің өз өмірі мен денсаулығына ғана емес, өзге де жол қозғалысына қатысушылардың қауіпсіздігіне қауіп төндіреді.
«Қауіпсіз жол» жедел-профилактикалық іс-шарасы аясындағы профилактикалық жұмыстар жалғасуда. Оның негізгі мақсаты – жол-көлік оқиғаларының алдын алу, жолдағы тәртіпті күшейту және барлық жол қозғалысына қатысушылардың қауіпсіздік мәдениетін қалыптастыру.
Ақпарат көзі : https://www.gov.kz/memleket/entities/mvd-astana/press/news/details/1258956?lang=ru
Жауап қалдыру Жауапты болдырмау