22 шілдеде Шығыс Қазақстан облысында жаңбыр, найзағай және екпінді жел күтілед

Шығыс Қазақстан облысында тұрақсыз ауа райы күтілуде. Синоптиктердің болжамынша, бірқатар ауданда найзағаймен қоса қатты жаңбыр жауып, бұршақ түсуі және екпінді жел соғуы мүмкін. Сонымен қатар, Altainews.kz тілшісі хабарлағандай, өңірде өрт қаупінің жоғары және төтенше деңгейі сақталып отыр.

«Қазгидрометтің» Шығыс Қазақстан филиалының мәліметінше, 22 шілдеге қараған түні облыстың солтүстігінде, шығысында және оңтүстігінде жаңбыр (кей жерлерде қатты жаңбыр және найзағай) күтіледі. Жауын-шашын күндіз де жалғасады; солтүстік және шығыс аудандарда қатты жаңбыр, бұршақ және екпінді жел болады деп болжануда.

Жел бағыты оңтүстік-шығыстан оңтүстік-батысқа ауысады. Облыстың батыс, солтүстік және оңтүстік бөліктерінде желдің жылдамдығы секундына 15–20 метрді құрап, күндіз екпіні секундына 25 метрге жетуі мүмкін.

Өскемен қаласында да жаңбыр жауып, найзағай ойнайды деп болжануда. Күндіз бұршақ жаууы және екпіні секундына 15–20 метрге жететін қатты жел соғуы ықтимал.

Жауын-шашын күтілгеніне қарамастан, Шығыс Қазақстан облысының солтүстігі мен оңтүстік-батысында өрт қаупінің жоғары деңгейі сақталады. Облыстың солтүстік-батыс, оңтүстік-шығыс және орталық бөліктерінде өрт қаупінің төтенше деңгейі күшінде қалады.

Шығыс Қазақстан облысы Төтенше жағдайлар департаментінің құтқарушылары мынадай кеңестер береді:

– найзағай кезінде үй ішінде болу;

– қолайсыз ауа райы кезінде электр құрылғыларын желіден ажырату және оларды пайдаланбау;

– далада болған кезде металл қоршаулардың, жарнамалық қалқандардың жанында немесе биік жерлерде тұрмау;

– қатты жел кезінде салбырап тұрған электр желілерінен, тербелетін заттардан, ағаштар мен аялдамалардан аулақ болу;

– үйлердің немесе ғимараттардың жанында от жақпау, сондай-ақ құрғақ шөп пен қамысты өртемеу;

– алғашқы өрт сөндіру құралдарын қолжетімді жерде ұстау;

– көлік терезесінен сөнбеген темекі тұқылын немесе шыны ыдыстарды лақтырмау;

– өрт қауіпсіздігінің арнайы режимі енгізілген жағдайда, ол алынғанша орманға барудан қатаң түрде бас тарту;

 

Төтенше жағдай туындаған кезде 112 нөміріне хабарласыңыз.

Ақпарат көзі : https://www.gov.kz/memleket/entities/vko-shemonaiha-vavilon/press/news/details/1261716?lang=ru