«Отбасы зорлық-зомбылықсыз» республикалық акциясы аясында отбасылық-тұрмыстық зорлық-зомбылыққа қарсы күрес тобының инспекторлары «Мечта» жазғы сауықтыру лагерінде демалып жатқан балалармен профилактикалық кездесу өткізді.

Іс-шараның негізгі мақсаты – балалардың бір-біріне деген құрмет сезімін қалыптастыру, қауіпсіз мінез-құлық дағдыларын дамыту, сондай-ақ зорлық-зомбылықтың кез келген түрі мен құқыққа қайшы әрекеттердің алдын алу болды. Кездесу барысында полиция қызметкерлері балаларға қолжетімді әрі қызықты түрде отбасы құндылықтары, өзара сыйластық, сенім туралы айтып, қиын өмірлік жағдайларға тап болған кезде дер кезінде ересектерден немесе құзырлы органдардан көмек сұраудың маңыздылығын түсіндірді.
Кездесу барысында сталкинг тақырыбына ерекше назар аударылды. Инспекторлар балаларға сталкинг ұғымының мәнін, оның белгілерін, ықтимал салдарын және адамды негізсіз қудалау немесе мазалау жағдайында өзін қауіпсіз ұстау ережелерін түсіндірді. Ақпаратты балалардың жақсы қабылдауы үшін түрлі тақырыптық суреттер мен иллюстрациялар көрсетіліп, өмірде кездесетін жағдайлар мысалға алынып, дұрыс әрекет ету жолдары талқыланды. Кездесу соңында полиция қызметкерлері балалардың қойған сұрақтарына жауап беріп, айналасындағылардың құқықтарын құрметтеу, қауіпсіз қарым-қатынас мәдениетін сақтау, сондай-ақ зорлық-зомбылық, қорқыту немесе қудалау фактілері орын алған жағдайда міндетті түрде ересектерге немесе полиция қызметкерлеріне хабарлау қажеттігін еске салды.
Осындай профилактикалық іс-шаралар кәмелетке толмағандардың құқықтық сауаттылығын арттыруға, жауапкершілік сезімін қалыптастыруға және әрбір бала үшін қауіпсіз орта құруға ықпал етеді.

Ақпарат көзі : https://www.gov.kz/memleket/entities/mvd-pavlodar/press/news/details/1261917?lang=ru