🔹Ұлытау облысы Жаңаарқа ауданының Орталық көпсалалы ауруханасының жылжымалы медициналық кешені (ЖМК) Жаңаарқа ауданының шалғайдағы елді мекендерінде (Айнабұлақ, Қарағаш, Кенжебай-Самай, Түгіскен, Ақбастау, Ералиев, Манадыр, Ақтүбек, Атасу және т.б.) көшпелі медициналық қызмет көрсетеді. Аталған елді мекендер аудан орталығынан едәуір қашықтықта (165 км-ге дейін) орналасқан. Сонымен қатар, 2025 жылдан бастап ЖМК облыстың Ұлытау ауданы тұрғындарына да қызмет көрсетуде. ЖМК қызметінің негізгі мақсаты – жекелеген медициналық қызмет түрлері тұрақты түрде көрсетілмейтін ауылдық елді мекендердің тұрғындарына мамандандырылған медициналық көмектің қолжетімділігін қамтамасыз ету.
🔹ЖМК құрамында әртүрлі бейіндегі мамандар жұмыс істейді: хирург, гинеколог, оториноларинголог дәрігер, офтальмолог дәрігер, ультрадыбыстық диагностика дәрігері, стоматолог дәрігер, терапевт және педиатр. Сонымен қатар, кешен электрокардиография, рентгенологиялық зерттеулер, ультрадыбыстық диагностика жүргізуге, сондай-ақ көшпелі қызмет барысында зертханалық талдаулар орындауға мүмкіндік беретін заманауи диагностикалық жабдықтармен қамтамасыз етілген.
🔹Көшпелі медициналық қызмет бекітілген кестеге сәйкес жүзеге асырылады және консультативтік қабылдауды, диагностикалық тексерулерді, профилактикалық қарап-тексерулерді, диспансерлік бақылауды, ауруларды ерте анықтауды, сондай-ақ пациенттерді әрі қарай емдеу тактикасын айқындауды қамтиды. Бұл шалғай ауылдық елді мекендер тұрғындары үшін медициналық көмектің қолжетімділігі мен сапасын едәуір арттыруға мүмкіндік береді.
🔹Жылжымалы медициналық кешен жыл сайын Жаңаарқа ауданы бойынша 12 000 тұрғынға, ал Ұлытау ауданы бойынша 1 200 тұрғынға медициналық қызмет көрсетеді.
Ақпарат көзі : https://www.gov.kz/memleket/entities/ulytau-densaulyk/press/news/details/1262877?lang=ru
Жауап қалдыру Жауапты болдырмау