2026 жылғы 25 тамыздан бастап Қазақстанда атқарушы өндіріс аясында алимент аудару тәртібі өзгереді. Бұл туралы Әділет министрлігінің баспасөз қызметі хабарлады.
Жаңа ережеге сәйкес, қаражат тек арнайы банк шоттарына ғана есептеледі. Бұл ретте алимент алушы шоттың деректемелерін сот орындаушысына міндетті түрде ұсынуы тиіс.
Бұл жаңа тәртіп 2026 жылғы 24 маусымдағы «Атқарушы өндіріс және сот орындаушыларының мәртебесі туралы» заңға енгізілген түзетулер шеңберінде қарастырылған.
Әділет министрлігінің түсіндіруінше, бұл шара арнайы алимент шотындағы ақшаны алушының басқа міндеттемелері бойынша қамауға қоюдан қорғау үшін жасалып отыр. Бұл балалар мен еңбекке қабілетсіз тұлғаларды асырауға арналған қаражаттың сақталуына кепілдік береді.
Алушылар не істеуі керек?
- Атқарушы өндіріс арқылы алимент алатын азаматтар арнайы шот ашуы қажет.
- Шот ашылғаннан кейін оның деректемелерін сот орындаушысына тапсыру керек.
- Арнайы шоттарды ашу және жүргізу тәртібі Ұлттық банктің ережелерімен реттеледі.
Арнайы шоттың болмауы борышкерді алимент төлеу міндетінен босатпайды. Алайда, деректемелер ұсынылмайынша, сот орындаушысы өндіріліп алынған ақшаны алушыға аудара алмайды. Бұл ретте берешек есептеле береді және есептен шығарылмайды.
Ақпарат көзі : https://www.gov.kz/memleket/entities/almaty-bala/press/news/details/1263678?lang=ru
Жауап қалдыру Жауапты болдырмау