Білім беру жүйесінде балалардың инженерлік, логикалық және алгоритмдік ойлауын ерте жастан дамытуға ерекше көңіл бөлініп отыр. Осы бағытта Астана қаласының мектепке дейінгі ұйымдарында LEGO-конструкторлар мен робототехника элементтері білім беру үдерісіне енгізіліп, тәрбиеленушілер ойын арқылы бағдарламалау, модельдеу және жобалау дағдыларын меңгеріп жатыр, деп хабарлайды елорда әкімдігінің ресми сайты.
Астана қаласы әкімдігінің №82 «Айару» балабақшасында LEGO конструкторлары, Robot Mouse, Blue-Bot, Botley және UARO Coding Robot сияқты заманауи білім беру құралдары пайдаланылады. Сабақ барысында балалар роботтардың қозғалыс бағытын жоспарлап, алгоритм құрады, оларды бағдарламалап, тапсырмаларды орындау арқылы логикалық ойлауын, кеңістікті бағдарлауын, шығармашылық қабілетін және ұсақ моторикасын дамытады. Сонымен қатар, жұппен және топпен жұмыс істеу арқылы қарым-қатынас пен командалық жұмыс дағдыларын қалыптастырады.
Робототехника сабақтары балаларды инженерия мен бағдарламалаудың бастапқы негіздерімен таныстырып, зерттеушілік қабілеттерін дамытуға мүмкіндік береді. Балалар өз жобаларын құрастырып, бағдарламаның нәтижесін талдап, қателерді түзету арқылы мәселені шешу және сыни ойлау дағдыларын меңгереді. Бұл STEM-білім беру элементтерін мектепке дейінгі кезеңнен бастап игеруге жол ашады.
№82 «Айару» балабақшасының тәрбиеленушілері алған білімдерін халықаралық деңгейде де дәлелдеп келеді. Осы жылы олар мектепке дейінгі робототехника және бағдарламалау бойынша өткен V халықаралық «Жас ғарышкер» фестиваліне қатысып, «Робот арасы (Blue-Bot)» және «Байқоңыр және ғарыш балалар көзімен» номинацияларында алгоритм құру мен роботтарды бағдарламалау бойынша өз шеберліктерін көрсетті.
Ақпарат көзі : https://www.gov.kz/memleket/entities/astana/press/news/details/1264656?lang=ru
Жауап қалдыру Жауапты болдырмау