Жаздың аптап ыстығында Жетісу облысы патрульдік полициясының қызметкерлері жүргізушілердің қауіпсіздігін өзгеше тәсілмен еске салуды жөн көрді. Құжаттарын тексерудің орнына олар көлік жүргізушілерін салқын сумен қарсы алып, шөлін басып, сергіп алуға шақырды. Ұзақ жолдан шаршаған жүргізушілерге беті-қолын жуып, аздап тынығып алуды ұсынған полицейлердің бұл әрекеті көпшілікті жағымды таңғалдырды.
Бұл қарапайым қамқорлық әрбір көліктің тізгінінде өз денсаулығы мен сергектігін сақтауы маңызды адам отырғанын еске салды. Себебі аптап ыстық, шөлдеу мен шаршау жүргізушінің зейінін төмендетіп, орны толмас қайғылы жағдайға себеп болуы мүмкін.
Жолды жалғастырмас бұрын полицейлер әрбір жүргізушіге мынадай қарапайым, бірақ маңызды сөздерді айтты:
«Асықпаңыз. Жол қозғалысы ережелерін сақтаңыз. Өзіңізді қорғаңыз. Үйде сізді жақындарыңыз күтіп отырғанын ұмытпаңыз».
Кейде бірнеше минуттық тынығу, бір жұтым су мен шынайы жанашырлық қайғылы оқиғаның алдын алуға сеп болады. Өйткені профилактика тек заң талаптарын орындаумен ғана емес, адамдарға деген қамқорлықтан да басталады.
Ақпарат көзі : https://www.gov.kz/memleket/entities/mvd-zhetysu/press/news/details/1264908?lang=ru
Жауап қалдыру Жауапты болдырмау