Құқықтық ағартуды дамыту, сот жүйесіне деген сенімді нығайту және судья мамандығын әйгілендіру бойынша жүйелі жұмыс аясында Жоғары Сот Кеңесі судьяның құрметті отставкасы институтына арналған ақпараттық бейнематериал дайындады

Құқықтық ағартуды дамыту, сот жүйесіне деген сенімді нығайту және судья мамандығын әйгілендіру бойынша жүйелі жұмыс аясында Жоғары Сот Кеңесі судьяның құрметті отставкасы институтына арналған ақпараттық бейнематериал дайындады

Аталған институт кәсіби қызметті аяқтаудың ерекше нысаны ретінде қарастырылады. Ол мемлекет тарапынан сот төрелігін жүзеге асыруға сіңірген еңбекті мойындаудың көрінісі әрі сот билігінің тәуелсіздігінің маңызды кепілі болып табылады.

Бағдарламаның сарапшысы ретінде Жоғарғы Соттың құрметті отставкадағы судьясы, Еуропалық Одақ құқығының докторы, заң саласында 40 жылдан астам қызмет еткен Ақылтай Қасымов болды.

Сұхбат барысында Ақылтай Қасымов өзінің кәсіби жолының негізгі кезеңдері туралы айтып, сот төрелігінің іргелі миссиясына қатысты көзқарасымен бөлісті. Сондай-ақ қазіргі судьялар корпусына жоғары кәсіби құқықтық құзыреттермен қатар, этикалық қағидаттарды қатаң сақтау, жоғары өзіндік тәртіп және үздіксіз кәсіби даму талап етілетінін атап өтті.

Ол соңғы екі жылда Жоғары Сот Кеңесінің қызметінде жүзеге асырылған ауқымды оң өзгерістерге жоғары баға беріп, судья кадрларын іріктеу жүйесін жаңғыртудағы Жоғары Сот Кеңесі Төрағасының жеке үлесін ерекше атап өтті.

Материалда кадрлар даярлау жүйесіндегі институционалдық өзгерістерге де ерекше назар аударылды. Ақылтай Қасымов Сот төрелігі академиясының Жоғары Сот Кеңесінің қарамағына берілуін және докторантураның ғылыми-білім беру бағдарламасының іске қосылуын салалық ғылымды дамыту мен жоғары білікті кадрлар резервін қалыптастыру жолындағы маңызды қадам ретінде бағалады.

Жас заңгерлер мен қызметтегі судьяларға үндеу жолдаған Ақылтай Қасымов сот билігінің қоғам алдындағы жоғары жауапкершілігіне назар аударып, кәсіби біліктілікті ұдайы жетілдірудің маңыздылығын атап өтті.

Осындай ақпараттық материалдарды дайындау және жариялау Жоғары Сот Кеңесінің жүйелі жұмысының бір бөлігі болып табылады және судьялар дәстүрінің сабақтастығын қамтамасыз етуге, кәсіби құндылықтарды дәріптеуге әрі қоғаммен ашық диалогты дамытуға бағытталған.

Ақпарат көзі : https://www.gov.kz/memleket/entities/vss/press/news/details/1265101?lang=ru