31 шілдеден бастап Алматы мен Измир қаласы арасында тікелей әуе рейсі іске қосылады. SunExpress әуе компаниясы ашқан жаңа бағыт Қазақстан мен Түркия арасындағы туристік, іскерлік және мәдени байланысты одан әрі нығайтып, қаланың халықаралық әуе желісін кеңейтеді.
Измир – Түркияның ірі туристік және экономикалық орталықтарының бірі, сондай-ақ Эгей теңізі жағалауының басты әуе қақпасы. Жаңа рейс екі қала арасындағы қатынасты жеңілдетіп, туристер легінің артуына ықпал етеді.
Рейстер 2026 жылдың қазан айының соңына дейін аптасына екі рет – сейсенбі және жұма күндері Boeing 737-800 ұшағымен орындалады. Ұшақ Измирден сағат 21:00-де ұшып, келесі күні 05:00-де Алматыға қонады. Кері бағыттағы рейстер сәрсенбі және сенбі күндері жүзеге асырылады: Алматыдан ұшу – 06:25, Измирге келу – 09:50.
Халықаралық әуе бағыттарын көбейту Алматының туристік әлеуетін арттырудағы басым бағыттардың бірі. Жаңа рейс қаланың көлік қолжетімділігін жақсартып қана қоймай, Алматының Орталық Азиядағы жетекші туристік әрі авиациялық хаб ретіндегі мәртебесін одан әрі нығайта түседі.
Ақпарат көзі : https://www.gov.kz/memleket/entities/almaty/press/news/details/1266204?lang=ru
Жауап қалдыру Жауапты болдырмау