Қазіргі таңда еңбек қатынастарын цифрландыру жағдайында еңбек шарттарын дұрыс рәсімдеу және олар туралы мәліметтерді Еңбек шарттарын есепке алудың бірыңғай жүйесіне — ЕШЕБЖ-ға уақтылы енгізу ерекше маңызға ие.
Электрондық еңбек шарты — цифрлық форматта рәсімделетін және тараптар электрондық цифрлық қолтаңба арқылы қол қоятын еңбек шарты. Қолданыстағы заңнамаға сәйкес, жұмыс беруші еңбек шартын қағаз түрінде де, электрондық форматта да жасасуға құқылы. Алайда таңдалған нысанына қарамастан, жұмыс беруші еңбек шарты туралы белгіленген мәліметтерді ЕШЕБЖ-ға енгізуге міндетті.
Еңбек шарттарын есепке алудың бірыңғай жүйесі еңбек шарттарын, еңбек қызметін және жұмыскерлердің санын есепке алуға арналған. Жүйеде дұрыс әрі толық мәліметтердің болуы еңбек қатынастарының болғанын, жұмыс орнын, атқаратын лауазымын, жұмысқа қабылданған күнін және еңбек қызметінің кезеңін ресми түрде растауға мүмкіндік береді. Бұл азаматтардың еңбек және әлеуметтік құқықтарын қорғауға, бейресми жұмыспен қамтуды азайтуға және еңбек қатынастарының ашықтығын арттыруға ықпал етеді.
ЕШЕБЖ-ға мәліметтерді енгізу міндеті жұмыс берушіге жүктеледі. Жүйеге еңбек шартын жасасу және тоқтату, сондай-ақ оған енгізілген өзгерістер мен толықтырулар туралы ақпарат енгізіледі. Міндетті мәліметтердің қатарында жұмыскердің ЖСН-ы, жұмыс берушінің БСН-ы немесе ЖСН-ы, жұмыскердің лауазымы немесе еңбек функциясы, жұмыс орны, еңбек шартының мерзімі, жұмыстың басталу күні, еңбек шартының жасалған күні және нөмірі көрсетіледі.
Жұмыс беруші белгіленген мерзімдерді сақтауға міндетті. Жаңадан жасалған еңбек шарты туралы мәліметтер екі тарап қол қойған күннен бастап бес жұмыс күнінен кешіктірілмей ЕШЕБЖ-ға енгізілуі тиіс. Еңбек шартына енгізілген өзгерістер мен толықтырулар туралы ақпарат олар қол қойылған күннен бастап он бес күнтізбелік күннен кешіктірілмей, ал еңбек шартының тоқтатылғаны туралы мәлімет еңбек қатынастары тоқтатылған күннен бастап үш жұмыс күнінен кешіктірілмей енгізіледі.
Мәліметтерді HR Enbek еңбек ресурстары порталы арқылы немесе ЕШЕБЖ-мен интеграцияланған жұмыс берушінің кадрлық ақпараттық жүйесі арқылы енгізуге болады. HR Enbek порталында еңбек шартын толығымен электрондық форматта жасасу мүмкіндігі де қарастырылған. Бұл жағдайда еңбек шарты жұмыс беруші тарапынан қалыптастырылып, оған жұмыс беруші мен жұмыскер электрондық цифрлық қолтаңба арқылы қол қояды.
Жұмыскерге өзінің еңбек қызметі туралы мәліметтерді электрондық үкіметтің жеке кабинеті немесе Enbek сервистері арқылы тұрақты түрде тексеріп отыру ұсынылады. Сонымен қатар, ЕШЕБЖ-ға мәліметтердің енгізілуі еңбек шартының өзін алмастырмайтынын ескеру қажет. Жұмыскерді жұмысқа жібергенге дейін еңбек қатынастары заңнамада белгіленген тәртіппен тиісті түрде рәсімделуі тиіс.
ЕШЕБЖ-ға мәліметтерді енгізбеу немесе белгіленген мерзімдерді бұзу, ақпаратты толық көлемде ұсынбау, сондай-ақ дұрыс емес немесе қате мәліметтер енгізу жағдайларында Қазақстан Республикасының заңнамасына сәйкес әкімшілік жауаптылық көзделген.
Осылайша, еңбек қатынастарын уақтылы әрі дұрыс рәсімдеу — жай ғана формальды талап емес, жұмыс берушінің заңда белгіленген міндеті. Еңбек шарттарын есепке алудың бірыңғай жүйесіне дұрыс және нақты мәліметтердің енгізілуі еңбек қатынастарының ашықтығын қамтамасыз етіп, жұмыскерлердің еңбек және әлеуметтік құқықтарын қорғауға ықпал етеді.
Ақпарат көзі : https://www.gov.kz/memleket/entities/kostanai-enbek/press/news/details/1266307?lang=ru
Жауап қалдыру Жауапты болдырмау