Ағымдағы жылдың 29 шілдесінде Екібастұз қалалық мәслихатының экология мәселелері…

Ағымдағы жылдың 29 шілдесінде Екібастұз қалалық мәслихатының экология мәселелері жөніндегі жұмыс тобының төрағасы Амир Такишев пен жұмыс тобының мүшесі Арман Амургалинов «KAZ Minerals Bozshakol» ЖШС және «Kazferro Limited» ЖК кәсіпорындарында табиғатты қорғау іс-шараларының орындалуына көшпелі мониторинг жүргізді.

Аталған іссапар ағымдағы жылғы 15 шілдеде экология мәселелері бойынша өткен кеңесте қала әкімінің берген тапсырмасын орындау мақсатында ұйымдастырылды.

Мониторингтің негізгі мақсаты табиғатты қорғау іс-шараларының нақты іске асырылуымен танысу, кәсіпорындардың санитариялық-қорғау аймақтарының жағдайын бағалау, отырғызылған көшеттердің жерсіну деңгейін талдау, сондай-ақ қоршаған ортаға теріс әсерді төмендету бойынша қабылданып жатқан шараларды зерделеу болды.

«KAZ Minerals Bozshakol» ЖШС-не бару барысында жұмыс тобының өкілдері кәсіпорынның аумақты көгалдандыру және санитариялық-қорғау аймағын күтіп ұстау бойынша жүргізіп жатқан жұмыстарымен танысты.

Кәсіпорынның ағаш-бұта өсімдіктерін жүйелі түрде отырғызатыны, жасыл желектерге күтім жасап, суару жұмыстарын жүргізетіні және көшеттердің жерсіну көрсеткішін арттыруға бағытталған агротехникалық іс-шараларды жүзеге асыратыны анықталды. Сонымен қатар жасыл қорды одан әрі кеңейту және табиғатты қорғау бағдарламаларының тиімділігін арттыру мәселелері қарастырылды.

«Kazferro Limited» ЖК-де жұмыс тобының мүшелері өндірістік алаңдарды аралап, пеш жабдықтарының жұмысымен, өндірістік экологиялық бақылау жүйесімен және атмосфералық ауаға ластаушы заттардың шығарындыларын азайту жөніндегі іс-шаралармен танысты.

Кәсіпорын өкілдері өндірісті жаңғыртуға, экологиялық қауіпсіздікті арттыруға және табиғат қорғау заңнамасының талаптарын сақтауға бағытталған экологиялық жобалардың іске асырылуы туралы ақпарат берді.

Мониторинг барысында экологиялық нормативтердің сақталуы, жүзеге асырылып жатқан табиғатты қорғау іс-шараларының тиімділігі, сондай-ақ кәсіпорындардың экологиялық инфрақұрылымын одан әрі дамыту перспективалары мәселелеріне ерекше назар аударылды.

Көшпелі мониторинг қорытындысы бойынша жұмыс тобы кәсіпорындардың қоршаған ортаны қорғау саласында атқарып жатқан жұмыстарын оң бағалады.

Сонымен қатар кәсіпорындарға табиғатты қорғау қызметін одан әрі жетілдіру, санитариялық-қорғау аймақтарының жағдайына бақылауды күшейту, көгалдандыру көлемін ұлғайту және экологиялық мониторингтің тиімділігін арттыру жөнінде ұсынымдар берілді.

Қала аумағында табиғатты қорғау іс-шараларының орындалуын бақылау жұмыстары алдағы уақытта да жалғасып, Екібастұз қалалық мәслихатының тұрақты бақылауында болады.

Ақпарат көзі : https://www.gov.kz/memleket/entities/maslihat-pavlodar-ekibastuz/press/news/details/1266548?lang=ru