Қызылорда қаласында Жасанды интеллект және цифрлық даму вице-министрі Досжан Мұсалиевтің тұрғындармен кездесуі өтті. Онда аймақтың цифрлық инфрақұрылымын дамыту, байланыс сапасын жақсарту және жасанды интеллект негізіндегі жобаларды енгізу басты тақырыптар болды.
Кездесуді ашқан вице-министр Досжан Мұсалиев ведомствоның стратегиялық міндеттеріне баса назар аударды: «Мемлекет басшысы алдымызға Қазақстанды дамыған жасанды интеллект экосистемасы бар технологиялық мемлекетке айналдыру туралы нақты мақсат қойып отыр. Бүгінгі басты міндетіміз – шалғайдағы ауылдардағы жылдам интернеті бар ма, e-Otinish-тегі ақылды алгоритмдер ме, әлде заманауи мемлекеттік қызметтер ме, мейлі қандай озық цифрлық сервис болсын, аймағына қарамастан еліміздің әрбір тұрғыны үшін бірдей қолжетімді әрі ыңғайлы болуын қамтамасыз ету».
Бұдан әрі вице-министр «Қолжетімді интернет» ұлттық жобасы мен «Digital Qazaqstan» стратегиясы айналасында бұл міндеттердің аймақта іс жүзінде жүзеге асырылуын кеңінен баяндады. Атап айтқанда, 2029 жылға дейін Қызылорда облысында мектептер, ауруханалар мен әкімдіктерді қоса алғанда, 129 әлеуметтік және мемлекеттік нысанды жоғары жылдамдықты интернетке қосу, сондай-ақ мобильді байланыстың «ақ дақтарын» белсенді түрде жою және 4G пен 5G желілерін кеңейту жоспарланған.
Мемлекеттік сервистерге e-Otinish платформасына AI-модульдерді біріктіру, eGov AI сервисін іске қосу және отандық технологиялық бастамаларды дамытусияқты инновацияларды енгізуге ерекше назар аударылды.
Сонымен қатар, аймақта Apple Store тұжырымдамасы форматындағы жаңа цифрлық ХҚКО ашу мәселесі пысықталуда, сондай-ақ CITIZEN SEC және NOMAD GUARD платформалары арқылы киберқауіпсіздік және азаматтардың дербес деректерін қорғау бойынша жүйелі жұмыстар жалғасуда.
Іс-шара соңында тұрғындар өздерін толғандырған сұрақтарын қойып, ведомство басшылығынан тікелей жауаптар алды.
Ақпарат көзі : https://www.gov.kz/memleket/entities/maidd/press/news/details/1268649?lang=ru
Жауап қалдыру Жауапты болдырмау