ШҚО-да «Мектепке жол» жалпы республикалық қайырымдылық акциясы басталды

1 тамыздан бастап Қазақстанда «Мектепке жол» жалпы республикалық қайырымдылық акциясы басталды. Акция 1 тамыз бен 30 қыркүйек аралығында өтеді.

Акцияның мақсаты – жаңа оқу жылының басталуына дайындық кезеңінде аз қамтылған және көпбалалы отбасылардан шыққан мектеп оқушыларына, жетім балаларға, ата-анасының қамқорлығынсыз қалған балаларға материалдық қолдау көрсету және әлеуметтік себептерге байланысты балалардың мектепке келмеуінің алдын алу.

Бүгінгі таңда «Мектепке жол» жалпы республикалық қайырымдылық акциясын ұйымдастыру және өткізу жөніндегі өңірлік іс-шаралардың облыстық жоспары әзірленді. Сондай-ақ акцияны өткізудің облыстық штабы бекітілді.

Шығыс Қазақстан облысының аудандары мен қалаларында «Балаға қамқорлық сыйла!», «Мейірімді қолдар», «Ауыл балаларына мектепке сыйлықтар», «Отбасы отбасына көмектеседі: балаларды мектепке бірге дайындайық!» сияқты қайырымдылық акциялары ұйымдастырылады.

Акция кәсіпкерлерді, меценаттарды, мемлекеттік органдарды акцияны өткізуге қолдау көрсетуге және қиын өмірлік жағдайға тап болған отбасылар мен балаларға көмек көрсетуге өз үлестерін қосуға, олардың мектепке апарар жолын табуына жәрдемдесуге үндейтін болады.

Сондай-ақ бірінші сынып оқушыларына арналған «Алғашқы рет – бірінші сыныпқа», «Бірінші сынып оқушысына сыйлық» және басқа да мерекелік іс-шаралар ұйымдастырылады.

Сонымен қатар іс-шара аясында білім басқармасының мамандары Полиция департаментімен бірлесіп, дәлелді себепсіз мектепке бармайтын балаларды анықтау мақсатында рейдтік іс-шаралар жүргізетін болады.

Ақпарат көзі : https://www.gov.kz/memleket/entities/akimvko/press/news/details/1268762?lang=ru