Мойынқұм ауданында тұрғындардың өмірі мен денсаулығын қорғауға, төтенше жағдайлардың алдын алуға және қауіпсіздік мәдениетін қалыптастыруға бағытталған ауқымды ақпараттық-түсіндіру іс-шарасы ұйымдастырылды. Профилактикалық акцияның негізгі мақсаты – халықтың қауіпсіздік талаптарын сақтау жөніндегі білімін арттыру, төтенше жағдайлардың туындау қаупін төмендету және азаматтардың жеке жауапкершілігін күшейту.
Іс-шараға аудан әкімінің орынбасары Қуандық Төлеубеков, аудандық полиция бөлімінің қызметкерлері, төтенше жағдайлар бөлімінің мамандары, еріктілер және жауапты мекеме өкілдері қатысты. Олар аудан орталығындағы сауда орындарын, көпқабатты тұрғын үйлерді және халық көп шоғырланатын қоғамдық орындарды аралап, тұрғындармен тікелей кездесулер өткізді.
Кездесу барысында азаматтарға өрт қауіпсіздігі талаптарын сақтау, тұрмыстық газ құралдарын пайдалану кезінде сақтық шараларын орындау, электр желілерін қауіпсіз қолдану, сондай-ақ электр құрылғыларын қараусыз қалдырмау қажеттігі кеңінен түсіндірілді. Мамандар тұрғындардың қарапайым қауіпсіздік ережелерін күнделікті өмірде ұстануы көптеген төтенше жағдайлардың, өрт оқиғаларының және жазатайым жағдайлардың алдын алуға мүмкіндік беретінін атап өтті.
Сонымен қатар жаз мезгілінде ерекше назар аударуды қажет ететін балалар қауіпсіздігі мәселелері де жан-жақты түсіндірілді. Атап айтқанда, балалардың су айдындарында қараусыз қалуының қауіптілігі, тек рұқсат етілген орындарда шомылудың маңыздылығы, сондай-ақ көпқабатты тұрғын үйлердегі ашық терезелердің жанында балаларды қараусыз қалдырмау қажеттігі жөнінде нақты түсіндіру жұмыстары жүргізілді. Мамандар ата-аналарды балалардың қауіпсіздігіне ерекше жауапкершілікпен қарауға шақырды.
Ақпараттық акция барысында тұрғындарға қауіпсіздік ережелері көрсетілген арнайы жадынамалар таратылып, азаматтарды толғандырған сұрақтарға жан-жақты жауап берілді. Бұдан бөлек, аудан көшелерінде арнайы автокөлік арқылы дауыс зорайтқыштың көмегімен қауіпсіздік талаптары мен сақтық шаралары жөніндегі ақпараттық хабарламалар жарияланып, тұрғындарға төтенше жағдайлардың алдын алу бағытындағы маңызды ескертулер жеткізілді.
Осындай профилактикалық жұмыстардың басты мақсаты – әрбір тұрғынның қауіпсіздік мәдениетін қалыптастыру, күнделікті өмірде қауіпсіздік талаптарын сақтаудың маңызын түсіндіру және төтенше жағдайлардың алдын алу. Бұл бағыттағы жұмыстар мемлекеттік органдардың ғана емес, әрбір азаматтың жауапкершілігіне негізделген ортақ міндет болып табылады.
Мойынқұм ауданында халықтың қауіпсіздігін қамтамасыз етуге бағытталған мұндай ақпараттық-профилактикалық іс-шаралар алдағы уақытта да тұрақты түрде жалғасып, тұрғындар арасында түсіндіру жұмыстары жүйелі негізде жүргізілетін болады.
Ақпарат көзі : https://www.gov.kz/memleket/entities/zhambyl-moyynkum/press/news/details/1269019?lang=ru
Жауап қалдыру Жауапты болдырмау