Абай облысының полицейлері жол қауіпсіздігін қамтамасыз ету және азаматтардың өмірі мен денсаулығын қорғау бағытындағы профилактикалық жұмыстарды тұрақты түрде жүргізіп келеді. Таңғы уақыттағы кезекті патруль барысында тәртіп сақшылары MAZDA 626 автокөлігін басқарған күмәнді жүргізушіні байқайды.
Олар 49 жастағы азаматты тоқтатып, құжаттарын тексеру барысында алкогольдің иісі болмағанымен оның қимылдары мен сөйлеуі түсініксіз болды.
Медициналық куәландыру қорытындысына сәйкес, жүргізуші есірткілік масаң күйде болған. Аталған факті бойынша жүргізушіге қатысты әкімшілік іс қозғалып, материалдар сот қарауына жолданды.
Көлік құралы айыппұл тұрағына қойылды.
Қолданыстағы заңнамаға сәйкес, көлік құралын алкогольдік, есірткілік немесе токсикологиялық масаң күйде басқару, сондай-ақ осындай жағдайда көлік басқаруды басқа адамға беру – қоғамға жоғары қауіп төндіретін құқық бұзушылық болып табылады. Мұндай әрекет үшін 15 тәулікке дейін әкімшілік қамау және 7 жыл мерзімге көлік құралын басқару құқығынан айыру түріндегі қатаң жаза қарастырылған.
Жолдағы қауіпсіздік – әрбір жүргізушінің жеке жауапкершілігінен басталады. Бір адамның немқұрайдылығы өз өміріне ғана емес, өзге де жол қозғалысына қатысушылардың тағдырына әсер етуі мүмкін. Мас күйінде көлік басқару – бұл тек заң бұзу емес, адам өміріне тікелей қауіп төндіретін әрекет.
Абай облысы Полиция департаменті жүргізушілерге жол ережелерін қатаң сақтауға, көлік басқару кезінде жауапкершілік танытуға шақырады. Қандай да бір жағдайға қарамастан, мас күйде рөлге отыруға болмайды.
Ақпарат көзі : https://www.gov.kz/memleket/entities/mvd-abay/press/news/details/1270110?lang=ru
Жауап қалдыру Жауапты болдырмау