Ұлан-Батыр, 2026 жылғы 6 тамыз – Қазақстанның Моңғолиядағы Елшісі Алмас Сейтақынов Моңғолия Су агенттігінің директоры Зэнээмядарын Батбаярмен кездесті.
Келіссөздер барысында тараптар су ресурстарын басқару, су үнемдеу технологияларын енгізу және су ресурстарын ұтымды пайдалану салаларындағы Қазақстан мен Моңғолияның ынтымақтастығын дамыту перспективаларын талқылады.
Су ресурстарын бақылау және қорғау, халықты сапалы ауызсумен қамтамасыз ету, құрғақшылық пен су тасқындарының алдын алу, сондай-ақ климаттың өзгеруінің салдарларына қарсы іс-қимыл мәселелері бойынша тәжірибе алмасуға ерекше назар аударылды.
Елші сұхбаттасушыны ҚР Президенті Қасым-Жомарт Тоқаевтың БҰҰ аясында Халықаралық су ұйымын құру жөніндегі бастамасы туралы хабардар етті. Мұндай ұйымды құру су саласындағы халықаралық үйлестіруді нығайтуға, су ресурстарын ұтымды пайдалануға жәрдемдесуге және жаһандық әрі өңірлік су проблемаларына қарсы орнықты шешімдер әзірлеуге бағытталғаны атап өтілді.
2026 ж. 17-28 тамыз аралығында Ұлан-Батыр қаласында өтетін БҰҰ-ның Шөлейттенуге қарсы күрес жөніндегі конвенциясы Тараптар конференциясының 17-сессиясы (UNCCD COP17) қарсаңында А.Сейтакынов З.Батбаярды конференция аясында қазақстандық тарап ұйымдастыратын тақырыптық қосымша іс-шараға қатысуға шақырды.
Тараптар Қазақстан мен Моңғолияның бейінді мемлекеттік органдары мен ғылыми-зерттеу ұйымдары арасындағы өзара іс-қимылды нығайтудың маңыздылығын атап өтті.
Кездесу қорытындысы бойынша жұмыс байланыстарын жалғастыру және су саласындағы екіжақты ынтымақтастықты одан әрі дамыту туралы уағдаластыққа қол жеткізілді.
Ақпарат көзі : https://www.gov.kz/memleket/entities/mfa-ulaanbaatar/press/news/details/1270871?lang=ru
Жауап қалдыру Жауапты болдырмау