Абай облысы полиция департаментінің криминалисі Талғат Нұрғазыұлы Абай күні қарсаңында қызына ұлы ақын туралы кітаптан оқып берумен ғана шектелмей, оны Абай Құнанбайұлының өмір сүріп, шығармашылықпен айналысқан қасиетті мекені – Жидебайға алып баруды жөн көрді.
Кішкентай Ақпейіл үшін бұл Абай әлемімен алғашқы шынайы таныстық болды. Әкесімен бірге ол ақынның үйін аралап, тұрмыс-тіршілігімен танысты. Абайдың шығармашылығына не әсер еткенін, оның нені толғағанын және неліктен білімге, еңбекке, ар-ұятқа, ел болашағына ерекше мән бергенін білді.
– Қызым Абайдың есімін ғана біліп қоймай, арада қанша жыл өтсе де, неге оның шығармаларын оқып, ойларына қайта оралатынымызды түсінсе екен дедім. Кей дүниені бір рет өз көзіңмен көріп, жүрегіңмен сезінген әлдеқайда әсерлі, – дейді полиция қызметкері.
Жидебай – қазақ халқы үшін қасиетті, тарихи әрі рухани мәні зор мекен. Мұнда өткен мен бүгіннің байланысы анық сезіледі. Абайдың бұдан бір ғасырдан астам уақыт бұрын айтқан ойлары бүгін де өзектілігін жоғалтқан жоқ.
Білімге ұмтылу, адал еңбек ету, әділ болу, өз ісіне жауапкершілікпен қарау және халқына деген сүйіспеншілік – ұлы ойшыл мұрасының негізгі өзегі.
Сондықтан әке мен қыздың сапары жай ғана экскурсиямен шектелмеді. Жол бойындағы әңгіме білім, еңбек, ар-ұят, адамгершілік пен өзгені құрметтеу туралы тағылымды әңгімеге ұласты.
Бұл сауалдардың жауабын Абай өз шығармалары мен “Қара сөздерінде” кейінгі ұрпаққа аманат етіп қалдырған.
Сапар барысында әкесі мен қызы Абайдың үйінде отырып, “Қара сөздерді” бірге оқыды. Ақпейіл үшін бұл – ұлы ақынмен алғашқы жақын таныстық болса, әкесі үшін қызына өзіне бала кезінде үлкендер үйреткен құндылықтарды жеткізудің ерекше мүмкіндігі болды.
Өз тарихына, мәдениетіне және рухани мұрасына деген құрмет осындай қарапайым, бірақ мағыналы сәттерден қалыптасады.
Бәлкім, Ақпейілдің “Абай деген кім?” деген сұрағына ең шынайы жауап дәл осы жерде – Жидебайда берілген шығар.
Өйткені Абай – оқулықтағы есім ғана емес. Абай – ұрпақтан-ұрпаққа жетіп, бүгінгі күнге дейін адамды ойлантып, білімге, еңбекке және адамгершілікке үндейтін ұлы мұра.
Ақпарат көзі : https://www.gov.kz/memleket/entities/qriim/press/news/details/1271552?lang=ru
Жауап қалдыру Жауапты болдырмау