Алматы Түркиямен әуе қатынасын кеңейтуде: Измирге тікелей рейс ашылды

31 шілдеден бастап Алматы мен Түркияның Измир қаласы арасында SunExpress әуе компаниясының тікелей рейсі қатынай бастады.

Жаңа бағыт Алматының халықаралық әуе желісін толықтырып, Қазақстан мен Түркия арасындағы туристік және іскерлік байланысты одан әрі дамытуға жол ашады.

Измир – Түркияның Эгей жағалауындағы ірі туристік әрі экономикалық орталықтардың бірі. Тікелей рейс екі қала арасындағы сапарды жеңілдетіп, туристер ағынының артуына ықпал етеді.

Рейстер қазан айының соңына дейін аптасына екі рет – сейсенбі және жұма күндері Boeing 737-800 ұшағымен орындалады. Әуе кемесі 189 жолаушыға арналған.

Халықаралық бағыттар желісінің кеңеюі Алматының көлік қолжетімділігін арттырып, қаланың өңірдегі жетекші туристік және авиациялық орталық ретіндегі орнын нығайта түседі.

Ақпарат көзі : https://www.gov.kz/memleket/entities/almaty-tourism/press/news/details/1271294?lang=ru