Қазақстан Республикасының Әділет министрі Ерлан Сәрсембаев Үкімет отырысында «Заң мен тәртіп» қағидатын іске асыру аясында министрлік тарапынан жүргізіліп жатқан және ең алдымен азаматтардың құқықтарын қорғауға бағытталған жұмыстарымен таныстырды.
Негізгі назар нотариаттық қызмет пен атқарушылық іс жүргізуді жетілдіруге, олардың ашықтығын арттыруға және азаматтардың құқықтарын қорғауды күшейтуге аударылды.
Осы бағытта цифрлық шешімдер енгізілуде. Соның бірі – «Тараптар кабинеті», ол өндіріп алушы мен борышкерге кез келген уақытта атқарушылық іс жүргізу материалдарымен танысуға, оның ағымдағы мәртебесін көруге, жасалған әрекеттер мен қабылданған шараларды тексеруге, сондай-ақ электрондық форматта өтініштер мен өтінішхаттар жолдауға мүмкіндік береді. «Тараптар кабинеті» 2025 жылғы 1 шілдеден бастап іске қосылып, AdiletGov жүйесімен интеграцияланды.
Келесі кезеңде жасанды интеллектіні пайдалана отырып проактивті бақылау енгізіледі. Бұл атқарушылық іс жүргізудегі кідірістерді, ұзақ уақыт аяқталмай тұрған істерді, мерзімдердің бұзылуын және жедел әрекет етуді талап ететін өзге де проблемалық мәселелерді анықтауға мүмкіндік береді.
Сонымен қатар, Әділет министрлігі E-Notary жаңа цифрлық платформасын іске қосуда. Платформа нотариустың әрбір әрекетін тіркеуді, нотариустар мен азаматтарды биометриялық сәйкестендіруді, сондай-ақ азаматтарға өздерінің қатысуымен жасалған нотариаттық әрекеттерді бақылауға және қадағалауға мүмкіндік береді. Жасанды интеллект элементтері ұсынылған құжаттарды талдау, ықтимал сәйкессіздіктер мен тәуекелдерді анықтау үшін пайдаланылатын болады.
Басты мақсат – азаматтардың шағымдарына ден қоюдан олардың алдын алуға көшу және азаматтардың құқықтарын қорғауға бағытталған нотариат пен атқарушылық іс жүргізудің заманауи цифрлық моделін қалыптастыру.
Ақпарат көзі : https://www.gov.kz/memleket/entities/adilet/press/news/details/1272255?lang=ru
Жауап қалдыру Жауапты болдырмау