Қызметтегі кәсібилік, тәрбиедегі тағылым: полиция подполковнигінің тәлімді жолы

Қызметтегі кәсібилік, тәрбиедегі тағылым: полиция подполковнигінің тәлімді жолы

«Әйел бір қолымен бесікті тербетсе, екінші қолымен әлемді тербетеді» деген қанатты сөз полиция подполковнигі Айгүл Игембаеваның өмір жолына дәл келеді. Оның құқық қорғау саласындағы еңбек өтілі 28 жылдан асады. Осы жылдар ішінде ол ондаған кәсіби марапатқа ие болып, мол тәжірибе жинақтады. Ал өміріндегі ерекше мақтанышы – бүгінде өз жобасын дамытып, жас ұрпаққа білім беріп жүрген ұлы Бауыржан.

1998 жылы ішкі істер органдарындағы еңбек жолын алдымен келісімшарт бойынша бастаған ол, өзінің табанды еңбегінің арқасында подполковник шеніне жетіп отыр. 2010 жылдан бастап кәсіби қызметі Жамбыл облысы Полиция департаментінің Кадр саясаты басқармасымен байланысты.

Кадр қызметінің жұмысы көпшілікке көзге көріне бермегенімен, полиция қызметкерінің еңбек жолының басталуы осы жерден қалыптасады.

Көп жылғы тәжірибесі Айгүл Игембаеваға жас қызметкерлердің жаңа ортаға бейімделуіне көмектесуге және жылдар бойы жинақтаған тәжірибесімен бөлісуге мүмкіндік береді.

Қызмет жылдарында Айгүл Игембаеваның еңбегі 80-ге жуық марапат пен көтермелеуге ие болды. Олардың қатарында «Ішкі істер органдарының үздігі» төсбелгісі, «Мінсіз қызметі үшін» медалі және басқа да ведомстволық марапаттар бар.

Кәсіби қызметінде ұстанған қағидалары оның ұлын тәрбиелеуіне де әсер етті. Өмірдің түрлі қиындықтарына қарамастан, Айгүл Жұмаханқызы Бауыржанды жалғыз тәрбиелеп, оған сапалы білім алуға және өз жолын еркін таңдауға мүмкіндік берді. Ол әрдайым ұлының білімге деген қызығушылығын қолдап, жауапкершілік пен еңбекке баулыды.

2021 жылдан бері Бауыржан Жәдігеров елордадағы «Zialy Urpaq» мектебінің негізін қалаушы әрі директоры. Онымен қоса, спорттан да жетістікке жетіп, самбо мен каратэдан спорт шебері атанды. Оның еңбегі іскерлік ортада да жоғары бағаланып, Бауыржан Жәдігеров Forbes Kazakhstan рейтингіне енді.

Айгүл Игембаева үшін кәсіби жетістігі мен ұлының табысы – өмір жолындағы екі үлкен мақтанышы. Қызметте ол жас мамандарға кәсіби жолдың алғашқы қадамдарын жасауға көмектессе, отбасында бүгінде өзі жас ұрпаққа білім беріп жүрген азаматты тәрбиелеп өсірді.

Ақпарат көзі : https://www.gov.kz/memleket/entities/mvd-zhambyl/press/news/details/1272889?lang=ru