Бородулиха ауданында полицейлер тұрмыстық зорлық-зомбылықтан зардап шеккен, алайда көмек сұрап жүгінбеген екі әйелді анықтады.

Бородулиха ауданына ауқымды тексеру жүргізу үшін полицияның қосымша күштері жіберілді

Тіркелген оқиғалар мен ауыр қылмыстардың жасалу фактілеріне байланысты профилактикалық жұмысты күшейту мақсатында Абай облысы Полиция департаменті аппаратының қызметкерлері мен патрульдік полиция экипаждары Бородулиха ауданына жіберілді.

Олар Бородулиха аудандық полиция бөлімінің қызметкерлерімен бірлесіп, елді мекендерде ауқымды профилактикалық іс-шара өткізді.

Іс-шараға барлығы 90 адам қатысты. Оның ішінде 80 полиция қызметкері, сондай-ақ мемлекеттік органдардың өкілдері, еріктілер және бейінді қызмет мамандары болды.

Рейд барысында барлығы 113 әкімшілік құқық бұзушылық анықталды. Оның 49-ы қоғамдық қауіпсіздік пен профилактика саласына, ал 64-і жол қауіпсіздігіне қатысты.

Полицейлер 986 үйді аралап шықты. Тұрғындарға тұрмыстық зорлық-зомбылық пен интернет-алаяқтықтың алдын алу, балалардың қауіпсіздігін қамтамасыз ету және жол қозғалысы ережелерін сақтау бойынша ақпараттық материалдар таратылды.

58 сауда нысаны тексерілді. Кәсіпкерлермен алкоголь және темекі өнімдерін сату талаптарын сақтау жөнінде профилактикалық түсіндіру жұмыстары жүргізілді. Алкоголь өнімдерін түнгі уақытта сатқан екі сауда нүктесінің иесіне құқық бұзушылық жасауға ықпал ететін себептер мен жағдайларды жою туралы ұсыныстар енгізілді.

Сонымен қатар 32 жалдамалы пәтер тексерілді. Тұрғын үйді тиісті құжаттарсыз жалға берудің екі фактісі анықталды. Жиналған материалдар мемлекеттік кірістер органдарына жолданды.

Профилактикалық есепте тұрған азаматтарға ерекше назар аударылды. Барлығы 66 адам тексерілді. Олардың қатарында шартты түрде сотталғандар, алкогольді асыра пайдаланатын адамдар, сондай-ақ мінез-құлқына ерекше талаптар белгіленген азаматтар бар.

Аула-үй аралау барысында дене жарақаттары бар, бұған дейін полицияға жүгінбеген екі әйел анықталды. Отбасылық жанжал шығарғандар профилактикалық есепке қойылып, оларға қорғау нұсқамалары шығарылды.

Алкогольді жүйелі түрде асыра пайдаланатын сегіз адам дәрігер-наркологқа жіберілді. Олар қажетті ем қабылдап, маманға тұрақты түрде қаралуы тиіс.

62 азаматтық қару иесі тексерілді. Қару сақтау және тіркеу талаптарын бұзудың екі фактісі анықталды. Қару тәркіленіп, полиция бөлімінің арнайы сақтау бөлмесіне орналастырылды. Сонымен қатар бір тұрғын тіркелмеген ИЖ-17 тегіс ұңғылы мылтығын өз еркімен тапсырды.

Табиғатты қорғау полициясының қызметкерлері ағаш тасымалдаған екі КамАЗ көлігін тоқтатты. Олардың бірінде тиісті таңбалары жоқ 33 текше метр ағаш болған. Материалдар шешім қабылдау үшін «Семей орманы» резерватына тапсырылды. Екінші жүргізуші 6 текше метр ағаш тасымалдаған, сондай-ақ көлік құралына қажетті құжаттары болмаған.

Кешкі уақытта ювеналды полицияның мобильді тобы кәмелетке толмағандар арасындағы құқық бұзушылықтардың жолын кесті.

Абай облысы Полиция департаментінде ауданда кешенді профилактикалық іс-шаралар жалғаса беретінін атап өтті.

Ақпарат көзі : https://www.gov.kz/memleket/entities/mvd-abay/press/news/details/1274561?lang=ru