Астана қаласының Инвестициялар және кәсіпкерлікті дамыту басқармасымен бірлесіп, бизнес және мемлекеттік орган өкілдерінің қатысуымен кездесу өткізілді.
Оның барысында пробация қызметінің есебінде тұрған, шартты түрде мерзімінен бұрын босатылған, әкімшілік қадағалаудағы, сондай-ақ рақымшылық актісі негізінде босатылатын азаматтарды жұмысқа орналастыруға жәрдемдесу мәселелері талқыланды.
Астана қаласы Кәсіпкерлер палатасының директоры Қанат Алин ресми жұмысқа орналасу азаматтардың әлеуметтік бейімделуінің және қайта құқық бұзушылықтың алдын алудың маңызды шарттарының бірі деп атап өтті.
Осыған байланысты, аталған санаттағы азаматтарды жұмысқа қабылдауға дайын жұмыс берушілер қатарын кеңейту қажет. Оның ішінде жатақхана, қызметтік тұрғын үй немесе уақытша тұруға арналған өзге де орындар ұсына алатын жұмыс берушілерді тартуға ерекше назар аударған маңызды.
Сондай-ақ кәсіпкерлерді қылмыстық-атқару жүйесі мекемелерінің аумағында өндіріс орындарын ашуға тарту мүмкіндігі талқыланды. Бұл сотталғандар үшін қосымша жұмыс орындарын ашуға және оларды жұмыспен қамту деңгейін арттыруға мүмкіндік береді.
Басқарма басшысының орынбасары Қуандық Құрмашев әлеуметтік кәсіпкерліктің мүмкіндіктеріне тоқталды. Бүгінде Астанада тиісті тізімге 267 субъект енгізілген. Бұл елдегі бойынша статистиканың шамамен 15%-ын құрайды. Әлеуметтік кәсіпкерлер үшін жеңілдетілген несиелеу, 5 млн теңгеге дейінгі гранттар, мемлекеттік мүлікті жеңілдікпен жалға алу, сондай-ақ ақпараттық және консультациялық қолдау қарастырылған.
Талқылауға Еңбек мобильділігі орталығының директоры Олжас Омар, Astana Invest басқарма төрағасының орынбасары Сәбит Мұхамеджанұлы және Астана қаласы бойынша Қылмыстық-атқару жүйесі департаментінің өкілдері де қатысты.
Кездесу қорытындысы бойынша азаматтарды жұмысқа орналастыру және олардың әлеуметтік бейімделу мүмкіндіктерін кеңейту бағытында мемлекет пен бизнестің өзара іс-қимылын одан әрі жалғастыру туралы келісімге қол қойылды.
Ақпарат көзі : https://www.gov.kz/memleket/entities/astana-uir/press/news/details/1276911?lang=ru
Жауап қалдыру Жауапты болдырмау