Ермағанбет Бөлекпаев Абай ауданының тұрғындарымен кездесті

Абай ауданында коммуналдық және әлеуметтік инфрақұрылымды жаңғырту жұмыстары жүйелі түрде жалғасып келеді. Ауызсу мен кәріз жүйесі, жолдар мен абаттандыру, жылумен қамту, білім беру және денсаулық сақтау салаларына қатысты өзекті мәселелерді тұрғындар Қарағанды облысының әкімі Ермағанбет Бөлекпаевпен ашық кездесуде талқылады.

Кездесу еркін әрі ашық форматта өтті. Тұрғындардың сауалдарына облыс әкімі мен аудан басшылығы ғана емес, облыстық басқармалар мен аудандық бөлімдердің басшылары да жауап берді.

Ауданда коммуналдық инфрақұрылымды жаңартуға бағытталған жұмыстар кезең-кезеңімен жүзеге асырылып жатыр. Ягодное және Садовое ауылдарында су құбыры желілері тартылды. Ал бес шалғай елді мекенде – Восход, Поливное, Жон, Тасзаимка және Пахотное ауылдарында блокты-модульді су тазарту станциялары іске қосылды.

Абай қаласының орамішілік кәріз желілерін реконструкциялау жұмыстары да жалғасуда. Жол инфрақұрылымын жақсарту бағытында ауқымды жұмыстар жүргізіліп, қазіргі уақытта қаладағы екі көшеде реконструкциялау жұмыстары қолға алынған.

Өңір басшысы ауданның абаттандырылу деңгейіне оң бағасын берді.

– Абай ауданы – облыстағы ең таза аудандардың бірі. Абай қаласының көшелерімен де, ауылдармен де жүргенде көңіл қуанады. Барлығы ұқыпты, барлық жерде тазалық сақталған. Бұл – әкімдік жұмысының және, әрине, тұрғындардың өз жауапкершілігінің нәтижесі, – деді ол.

Абай ауданының әкімі Сәбит Оспанов ауданның әлеуметтік-экономикалық дамуы, атқарылып жатқан жұмыстар және алдағы жоспарлар туралы баяндады.

Кездесуде тұрғындар жиі көтеріп жүрген мәселелердің бірі – жылумен қамту болды. Әсіресе бұл мәселе Тыңда шағынауданының жеке секторындағы тұрғындар үшін өзекті. Олар аталған проблеманы бұған дейін де бірнеше рет көтерген болатын.

Қазір мұнда жылу желілерін тарту жұмыстары жүргізілуде. Жоба аяқталғаннан кейін жеке сектордағы тұрғын үйлерді орталықтандырылған жылумен қамту жүйесіне қосу көзделген.

– Тыңда тұрғындары бұл жобаны көптен күтті. Жеке секторды орталықтандырылған жылу жүйесіне қосу жылумен қамтудың сенімділігін арттырып, мәселені ұзақ жылдарға түбегейлі шешуге мүмкіндік береді, – деп атап өтті облыс әкімі.

Тұрғындар жеке секторға есепке алу құралдарын орнату мәселесін де көтерді. Ермағанбет Бөлекпаев бұл мәселені Монополияға қарсы комитетпен бірлесіп жан-жақты зерделеу қажет екенін айтты. Тиісті жұмыстар жүргізілгеннен кейін тұрғындарға қолданыстағы заңнама талаптарына сәйкес түсініктеме беріледі.

Кездесуде әлеуметтік салаға қатысты мәселелерге де ерекше көңіл бөлінді. Ауданда білім беру, денсаулық сақтау және спорт инфрақұрылымын дамыту жұмыстары жалғасып жатыр.

Өткен жылы аудан аумағында денсаулық сақтау саласының сегіз жаңа нысаны салынды. Бүгінде олардың барлығы жұмыс істеп, тұрғындарға медициналық қызмет көрсетуде.

Қала инфрақұрылымына қатысты мәселелер де назардан тыс қалған жоқ. Кездесуге қатысқан тұрғындардың бірі Абай қаласында автостанция мен жылы аялдамалардың жоқтығын айтты. Облыс әкімі бұл мәселенің өзекті екенін атап өтіп, оны шешудің ықтимал жолдарын қарастыруды тапсырды.

Тұрғындар жаңа қатты тұрмыстық қалдықтар полигоны мен сұрыптау кешенінің жұмысына қатысты да сауалдарын қойды.

Өңір басшысының айтуынша, жаңа полигонға тек Абай ауданынан шығарылатын қалдықтар қабылданады. Қоқыс полигонға көмуге жіберілмес бұрын міндетті түрде сұрыпталады. Қазір оның құрамынан картон, ПЭТ бөтелкелер, пластик, қаңылтыр банкалар және целлофан бөлініп алынады. Алдағы уақытта шыны, ағаш және металл қалдықтарын да сұрыптап, қайта өңдеуге жіберу жоспарланып отыр.

Сауда саласына қатысты мәселе де көтерілді. Тұрғындар бұрын жергілікті өндірушілердің өнімдерін қолжетімді бағамен сатып алуға мүмкіндік болған коммуналдық нарықтың жұмысын еске салды. Қазір абайлықтар дәстүрлі күзгі ауыл шаруашылығы жәрмеңкелерінің ұйымдастырылуын күтіп отыр.

Кездесу соңында Ермағанбет Бөлекпаев тұрғындарға белсенді азаматтық ұстанымы мен ауданның мәселелеріне бейжай қарамайтыны үшін алғыс білдірді. Диалог барысында көтерілген барлық мәселе бақылауға алынып, әр бағыт бойынша алдағы жұмыстардың нақты жоспары әзірленетін болды.