Алматы қаласында білім беру ұйымдарын жаңа 2026–2027 оқу жылына дайындау жұмыстары жалғасуда. Алматы қаласының санитариялық-эпидемиологиялық бақылау департаменті мектептердің, интернаттық үлгідегі ұйымдардың және мектеп асханаларының жаңа оқу жылына дайындығын бақылауды жүзеге асыруда.
2026 жылғы маусым айында білім беру ұйымдарының жаңа оқу жылына дайындығына мониторинг жүргізілді. Департаменттің бақылауында 364 мектеп бар, оның ішінде 250 мектеп мемлекеттік бюджет есебінен қаржыландырылады. Мониторинг барысында 247 мектеп қамтылды.
Мониторинг нәтижесінде 244 мектепте бұзушылықтар анықталып, оларды жою бойынша нұсқамалар берілді. Негізгі ескертулер сумен жабдықтау, желдету және жылыту жүйелерінің жағдайына, шатырларға, терезелер мен есіктерге, қоршауларға, спорттық және ойын жабдықтарына, сондай-ақ аумақтарды абаттандыруға қатысты болды.
Анықталған бұзушылықтарды жою жұмыстары жалғасуда. Бүгінгі таңда 221 нұсқама орындалды. Мектептер бойынша орындалу көрсеткіші 90,5%, ал интернаттық үлгідегі ұйымдар бойынша 100% құрады.
Мектептегі тамақтануға ерекше назар аударылады. Басты бағыттардың бірі – мектеп асханаларындағы санитариялық-эпидемиологиялық қауіпсіздікті және оқушылардың тамақтану сапасын қамтамасыз ету. Асханалар бойынша берілген 191 нұсқаманың барлығы толық орындалды – 100%. Белгіленген мерзімде нұсқамаларды орындамаған 15 мектепке қатысты жоспардан тыс тексерулер жүргізу жоспарлануда.
Сонымен қатар, Алматы қаласының Білім басқармасы және Алматы қаласының Қоғамдық денсаулық сақтау басқармасымен бірлесіп, 2026–2027 оқу жылына арналған перспективалық мәзірді әзірлеу және өзектендіру жұмыстары жалғасуда.
Жаңа мәзірге тағам түрлерін көбейту жоспарлануда. Атап айтқанда, тауық еті қосылған роллдар, балық таяқшалары қосылған роллдар және самса енгізіледі. Сондай-ақ айына бір рет «Бес дәнді дақыл» ботқасын ұсыну қарастырылған.
Мәзірді қалыптастыру кезінде қолданыстағы тамақтану стандартының талаптары, сондай-ақ мониторинг нәтижелері ескеріледі. Оның ішінде тағамдардың жеуге жарамсыздықиндексін төмендету қажеттілігіне ерекше көңіл бөлінеді. Мектептерде күрделі жөндеу жұмыстары жалғасуда.
Қазіргі уақытта Алматы қаласындағы білім беру ұйымдарында күрделі жөндеу жұмыстары да жүргізілуде. 7 мектепте толық күрделі жөндеу жүргізілуде.
Жөндеу жұмыстары жүргізілетін кезеңде білім беру процесі қажетті бос орын қоры бар жақын маңдағы мектептерде ұйымдастырылған. Бұл оқу процесінің үздіксіздігін қамтамасыз етуге және оқушылар үшін қауіпсіз жағдай жасауға мүмкіндік береді.
Ақпарат көзі : https://www.gov.kz/memleket/entities/departament-kkbtu-almaty/press/news/details/1279124?lang=ru
Жауап қалдыру Жауапты болдырмау