2026 жылғы 25 тамызда Ақмола облысы бойынша әлеуметтік осал топтардың құқықтары жөніндегі өңірлік уәкіл Анаргүл Мұхамедрахимова азаматтарды қабылдады.
Қабылдау барысында азаматтар өздерінің құқықтары мен заңды мүдделерін қорғауға қатысты мәселелер бойынша, оның ішінде тұрғын үй кезегіне тұру, мүгедектігі бар адамдар үшін нысандардың қолжетімділігі, жалақының төленбеуі, сондай-ақ атаулы әлеуметтік көмекті тағайындау мәселелері бойынша жүгінді.
Кәмелетке толмаған баланың ата-анасынан білім беру процесінде тьюторлық сүйемелдеуді қамтамасыз ету мәселесі бойынша келіп түскен өтініштердің бірі мамандар тарапынан алдын ала қаралып, азаматтарды қабылдау басталғанға дейін оң шешімін тапты. Баланың оқу барысында туындаған қиындықтарына байланысты көмек көрсету қажеттілігі айқындалған бұл мәселені шешуге ата-анаға тиісті қолдау көрсетілді.
Қабылдауға жұмыспен қамтуды үйлестіру және әлеуметтік бағдарламалар басқармасының басшысы Шолпан Рахматуллина, Көкшетау қаласы әкімінің орынбасары Айгүл Нугертаева, сондай-ақ білім беру, денсаулық сақтау басқармаларының, Көкшетау қаласының жұмыспен қамту және әлеуметтік бағдарламалар бөлімінің, «Отбасы банк» АҚ Ақмола облыстық филиалының және психологиялық-медициналық-педагогикалық сүйемелдеу жүйесі ұйымдарының өкілдері қатысты.
Өңірлік уәкіл Ақмола облысының әлеуметтік осал санаттарына жататын халықтың құқықтары мен заңды мүдделерін қорғау жөніндегі жұмысын жалғастыруда. Бұл ретте ведомствоаралық өзара іс-қимылды және практикалық қолдауды талап ететін өтініштерге ерекше назар аударылуда.
Ақпарат көзі : https://www.gov.kz/memleket/entities/aqmola-social/press/news/details/1279896?lang=ru
Жауап қалдыру Жауапты болдырмау