Көкжазық ауылындағы «Айналайын» балалар лагерінде балалар мен жасөспірімдер арасында нашақорлықтың алдын алуға бағытталған «Нашақорлық — ғасыр індеті» атты профилактикалық іс-шара өтті.
Іс-шараны Жетісу облысының Полиция департаменті Нашақорлықтың алдын алу жөніндегі кеңеспен бірлесіп ұйымдастырды. Шараға белгілі блогер @optimist.hafiz те қатысты.
Қатысушыларға есірткінің зияны, оның адам денсаулығы мен болашағына тигізетін зардабы, сондай-ақ салауатты өмір салтын ұстанудың маңыздылығы түсіндірілді. Наркологтар мен психологтар жасөспірімдермен профилактикалық әңгімелер өткізіп, қауіп-қатерлерден сақтану және теріс ықпалға қарсы тұру жолдарын түсіндірді.
Балалар үшін мазмұнды бағдарлама ұйымдастырылды. Каратэшілер мен Кинологиялық қызмет орталығы мамандарының көрсетілімдері өтіп, гір көтеру және арқан тартудан спорттық жарыстар ұйымдастырылды. Жеңімпаздарға арнайы сыйлықтар табысталды.
Профилактикалық жұмыстарға белсенді қатысып жүрген жас белсенділерге ерекше көңіл бөлінді. Оларға алғыс хаттар мен сыйлықтар табысталды. Сондай-ақ жас әншілер мен бишілер де марапатталды.
Іс-шара соңында балаларға ақпараттық брошюралар, сондай-ақ «Есірткіге жол жоқ!» деген жазуы бар футболкалар мен кепкалар таратылды.
Жетісу облысының полициясы жастар арасындағы профилактиканың негізі — дер кезінде жүргізілген түсіндіру жұмыстары, дұрыс ақпарат беру және есірткіге деген берік теріс көзқарасты қалыптастыру екенін атап өтеді.
Дені сау ұрпақ — қауіпсіз болашақтың кепілі. Ең бастысы — бүгін дұрыс таңдау жасау.
Ақпарат көзі : https://www.gov.kz/memleket/entities/mvd-zhetysu/press/news/details/1280438?lang=ru
Жауап қалдыру Жауапты болдырмау