«ҚазжолҒЗИ» АҚ мен қытайлық China TransInfo Technology Co., Ltd компаниясы ынтымақтастық туралы меморандумға қол қойды. Тараптар Қазақстанның жол саласына арналған заманауи шешімдерді бірлесіп дамытуға уағдаласты. Ынтымақтастық технологиялар трансферін, жабдықтарды жергіліктендіруді және отандық мамандарды қайта даярлауды қамтиды.
Келісім ҚазжолҒЗИ делегациясының Қытайға жұмыс сапары аясында жасалды. Ынтымақтастықтың негізгі бағыттарының бірі «ҚазжолҒЗИ» базасында бірлескен құзыреттер орталығын құру мүмкіндігін пысықтау болды.
Орталық технологиялық тәжірибе алмасу, қазақстандық мамандарды қайта даярлау, шетелдік әзірлемелерді отандық жағдайға бейімдеу және заманауи шешімдерді жол саласына одан әрі енгізу алаңына айналуы мүмкін.
Ынтымақтастықтың перспективалы бағыттарының қатарында зияткерлік көлік жүйелері, көлік құралдарының салмақ-габарит параметрлерін қозғалыс барысында бақылау, бейнеталдау, сондай-ақ жүргізушісіз көлікті одан әрі дамытуға қажетті өзара іс-қимыл технологиялары бар.
Тараптар технологиялар трансферіне және заманауи жабдықтарды Қазақстанда жергіліктендіру мүмкіндігіне ерекше назар аудармақ. Бұл тәсіл дайын шетелдік шешімдерді қолданумен қатар, оларды енгізу, пайдалану және одан әрі дамыту бойынша отандық құзыреттерді қалыптастыруға мүмкіндік береді.
Сапар барысында қазақстандық делегация China TransInfo Technology компаниясының іске асырылған жобаларымен және зияткерлік көлік инфрақұрылымы саласындағы технологиялық мүмкіндіктерімен де танысты.
China TransInfo Technology зияткерлік көлік жүйелерін, бейнеталдау технологияларын, салмақ-габариттік бақылау жүйелерін және цифрлық көлік инфрақұрылымына арналған шешімдерді әзірлеуге маманданған.
Қол қойылған меморандум Қазақстанның жол инфрақұрылымының ерекшеліктерін ескере отырып, нақты бірлескен жобаларды одан әрі пысықтауға және халықаралық технологиялық тәжірибені қолдануға негіз болмақ.
Ақпарат көзі : https://www.gov.kz/memleket/entities/transport/press/news/details/1280377?lang=ru
Жауап қалдыру Жауапты болдырмау