Ақтау гарнизонында мерзімді әскери қызметші Ербол Әзімов музыкаға қызығушылық танытатын әскердегі достарымен бірге «Бүркіт» музыкалық тобын құрды. Ұжым алғаш рет шілде айында әскери бөлімнің құрылған күніне арналған мерекелік концертте өнер көрсетті.
Ербол Әзімов 2026 жылдың көктемінде мерзімді әскери қызметке шақырылған. Бүгінде ол әуе шабуылына қарсы қорғаныс бригадасында әскери борышын өтеп, Маңғыстау облысының әуе кеңістігін қорғау міндеттерін атқарып жүр.
Әскерге шақырылғанға дейін Ербол музыкамен кәсіби түрде айналысқан. Ақтау қаласында «Level Improve Music» студиясын ашып, вокалдан сабақ берген. Сонымен қатар домбыра, гитара және фортепианода ойнауды үйреткен. Өнерге жақын жас бес музыкалық аспапта ойнайды.
Әскери қызметке кіріскен соң да ол сүйікті ісін жалғастырды. Ерболдың бастамасын музыкамен әуестенетін жауынгер жолдастары қолдап, көп ұзамай ортақ шығармашылық ұжым құрылды.
«Бүркіт» тобының алғашқы концерті шілде айында өтті. Музыканттар әскери бөлімнің жеке құрамы мен қонақтарына бірнеше музыкалық композиция орындап, мерекелік кештің сәнін келтірді.
– Музыка адамдарды бір арнаға біріктіреді. Әскери қызмет барысында да сүйікті ісіммен айналысып жүргеніме қуаныштымын. Бұл қызығушылығымды әсіресе қызметтестеріммен бөлісу маңызды, – дейді Ербол Әзімов.
Қазір «Бүркіт» тобының мүшелері тұрақты түрде дайындалып, жаңа шығармаларды меңгеруде. Жас музыканттар үшін өнер – бос уақытты тиімді өткізудің ғана емес, шығармашылық қабілеттерін шыңдаудың және әскери ұжымның мәдени өміріне өз үлесін қосудың жақсы мүмкіндігі.
Ақпарат көзі : https://www.gov.kz/memleket/entities/mod/press/news/details/1280764?lang=ru
Жауап қалдыру Жауапты болдырмау