Пәтер орнына – құр уәде: Өскеменде 186 млн теңгелік алаяқтықтың жолы кесілді
Облыс орталығында мемлекеттік бағдарлама арқылы баспана алуға көмектесуге уәде берген алаяқтық схема әшкереленді.
Шығыс Қазақстан облысының тұрғыны азаматтарға пәтерлерді тиімді бағамен ұсынып, оларды рәсімдеу жұмыстарын өз мойнына алатынын айтқан.
Тергеу мәліметтеріне сәйкес, 30 жастағы ер адам 2024 жылдың қарашасынан 2026 жылдың сәуіріне дейін әрекет еткен. Ол адамдарды өзіне қолма-қол ақша беруге және банк шоттарына ақша аударуға көндірген. Ақша алғаннан кейін тұрғын үйді тіркеу, құжаттарды рәсімдеу және басқа да төлемдер үшін қосымша шығындар қажет екенін айтып, жаңа талаптар қойған.
Жәбірленушілерді мәміленің шынайылығына түпкілікті сендіру үшін ер адам пәтер жалдап, оны олардың болашақ баспанасы ретінде көрсеткен. Азаматтар жақын арада баспананың кілтін аламыз деген үмітпен ақша беруді жалғастырған.
Алайда уәде етілген баспана мен құжаттарды олар сол күйі ала алмаған. Алаяқтың әрекетінен облыстың 25 тұрғыны зардап шеккен. Келтірілген жалпы шығын көлемі 186 445 000 теңгені құрады.
Күдікті ұсталып, полицияға жеткізілді. Қазіргі уақытта ол уақытша ұстау изоляторында. Жауап алу барысында өз кінәсін мойындаған.
Шығыс Қазақстан облысының Полиция департаменті азаматтарға тұрғын үй сатып алу үшін ақша бермес бұрын құжаттарды, келісім талаптарын және ұсыныстың заңдылығын мұқият тексеруді ескертеді. Тіпті тиімді баға мен сенімді уәделердің өзі ресми құжаттардың орнын баса алмайды.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1280818?lang=ru
Жауап қалдыру Жауапты болдырмау