Ақмола облысының білім басқармасы мен Канаданың Olds College арасында білім беру және ғылыми-зерттеу бағыттарындағы ынтымақтастық туралы меморандумға қол қойылды. Құжат өңір студенттері мен оқытушылары үшін халықаралық білім беру мүмкіндіктерін кеңейтіп, агротехнология, экология және агро-робототехника салаларындағы бірлескен жобаларды дамытуға жол ашады.
Меморандум аясында тараптар бірлескен білім беру бастамаларын, оның ішінде қолданбалы бакалавриат және бакалавриат бағдарламаларын әзірлеу мен дамыту мүмкіндіктерін қарастырады. Сонымен қатар қос дипломды білім беру бағдарламаларын және өзара келісілген басқа да академиялық жобаларды іске асыру көзделген.
Ынтымақтастықтың маңызды бағыттарының бірі – академиялық ұтқырлық. Оның аясында студенттер мен оқытушылар алмасуын ұйымдастыру, халықаралық тағылымдамаларға қатысу және семестрлік білім беру бағдарламаларына мүмкіндік беру жоспарланып отыр.
Меморандум ғылыми-зерттеу саласындағы серіктестікті де қамтиды. Атап айтқанда, агротехнология, экология және тұрақты даму бағыттарында бірлескен ғылыми жобалар жүргізу, сондай-ақ заманауи автоматтандырылған жүйелер мен инженерлік шешімдерді қамтитын агро-робототехника саласын дамыту көзделген.
«Бұл бастама өңіріміздің колледждерінің әлеуетін арттыруға, студенттердің халықаралық білім алуына және өзара тәжірибе алмасуына мүмкіндік беретін маңызды құжат. Бүгінгі меморандум алдағы уақытта бірлескен білім беру және ғылыми жобаларды жүзеге асыруға жаңа мүмкіндіктер ашады», – деп атап өтті техникалық және кәсіптік, орта білімнен кейінгі білім бөлімінің басшысы Нажмиден Нуралин.
Канададағы Olds College-пен орнатылған әріптестік Ақмола облысының техникалық және кәсіптік білім беру жүйесін халықаралық тәжірибемен ұштастыруға, білім алушылардың кәсіби құзыреттерін дамытуға және аграрлық сектор үшін заманауи технологияларды меңгерген жаңа буын мамандарын даярлауға бағытталған.
Ақпарат көзі : https://www.gov.kz/memleket/entities/aqmola-selinograd/press/news/details/1281648?lang=ru
Жауап қалдыру Жауапты болдырмау