Ақтөбедегі Әлия Молдағұлова атындағы Ақтөбе халықаралық әуежайы Даниядан келген халықаралық жүк жөнелтілімін қабылдады. Оның құрамында қызыл дат тұқымының 148 бас ірі қара малы бар. Ветеринариялық бақылаудан өткеннен кейін мал Батыс Қазақстан облысындағы шаруашылыққа жеткізіледі.
Бұл – Ақтөбе әуежайының жүк тасымалы бағытындағы мүмкіндіктері кеңейіп келе жатқанын көрсететін кезекті мысал. Халықаралық жүк тасымалы күрделі логистиканы және ветеринариялық талаптарды қатаң сақтауды қажет етеді. Осы ретте Ақтөбе біртіндеп Батыс өңірдегі маңызды көлік тораптарының біріне айналып келеді.
Әуежайдың жүк тасымалы бағытындағы әлеуетінің артуы жолаушылар ағынының тұрақты өсуімен қатар жүріп отыр. 2025 жылы Ақтөбе әуежайы өз тарихында алғаш рет 1 миллионнан астам жолаушыға қызмет көрсетті. Бұл – өңірдің әуе қақпасы үшін тарихи көрсеткіш.
Жолаушылар ағынының өсуіне халықаралық әуе бағыттарының кеңеюі де ықпал етуде. 2025 жылы Ақтөбеден Шарм-эль-Шейх, Доха, Фукуок және Ыстамбұл бағыттарына жаңа рейстер ашылды. 2026 жылы халықаралық бағыттар желісін кеңейту жұмысы жалғасты. Қазір Ташкент пен Баку қалаларына рейстер іске қосылды. Жыл соңына дейін Дубай және Үрімші бағыттарын ашу жоспарланып отыр.
Сонымен қатар әуежайдың жүк инфрақұрылымын дамытуға да басымдық берілуде. Заманауи логистикалық кешен құру жобасы аясында жүк өңдеу көлемін ұлғайтып, әртүрлі санаттағы, оның ішінде электронды сауда жүктері мен қауіпті жүктерді қабылдау және өңдеу мүмкіндігін арттыру көзделген.
Бұдан бөлек, шамамен 5 млрд теңге инвестиция тартылатын жанармай инфрақұрылымын жаңғырту жобасы жүзеге асырылуда. Келесі кезеңде әуежай инфрақұрылымын одан әрі дамыту және оның өткізу қабілетін арттыру жоспарланған. Өңірде әуежай негізінде заманауи мультимодальды көлік хабын қалыптастыру міндеті қойылып отыр.
Осылайша, Ақтөбе әуежайы біртіндеп өңірлік әуе айлағы рөлінен шығып, көпфункционалды авиациялық-логистикалық орталыққа айналу бағытында. Бір миллионнан астам жолаушыға қызмет көрсету, халықаралық рейстер географиясының кеңеюі және Еуропадан арнайы жүктерді қабылдау – өңірдің көлік-логистикалық әлеуетіне сұраныстың артып келе жатқанының айқын көрінісі.
Ақпарат көзі : https://www.gov.kz/memleket/entities/aktobe-veterinariya/press/news/details/1282059?lang=ru
Жауап қалдыру Жауапты болдырмау