Менингококк инфекциясы — бактериялар қоздыратын, әртүрлі клиникалық белгілермен өтетін жедел инфекциялық ауру. Ол симптомсыз тасымалдаушылық, назофарингит (мұрын мен жұтқыншақтың шырышты қабығының қабынуы), менингит (ми қабықтарының қабынуы) және менингококкты сепсис (қанның инфекциямен зақымдануы) түрінде көрінуі мүмкін.
Менингококк инфекциясына тез таралуы, ауыр клиникалық ағымы және өлім-жітімнің жоғары болуы (10%-ға дейін) тән. Көбінесе 14 жасқа дейінгі балалар ауырады, олардың арасында өмірінің алғашқы екі жылындағы балалар басым.
Инкубациялық кезеңі орта есеппен 2–4 күнді құрайды, кейде 10 күнге дейін созылуы мүмкін.
Негізгі клиникалық белгілеріне мыналар жатады: аурудың кенеттен басталуы, жалпы әлсіздік, дене қызуының 39,0 °C және одан жоғары деңгейге дейін күрт көтерілуі, қатты бас ауруы, жеңілдік әкелмейтін жүрек айну және құсу, құрысулар, бөртпе, желке бұлшықеттерінің сіресуі, тыныс алудың бұзылуы, естің тежелуі, сананың шатасуы.
МАҢЫЗДЫ! Менингококк инфекциясының белгілері пайда болған жағдайда, ешбір жағдайда өздігінен емделуге болмайды. Ауру өте жылдам өршуі мүмкін. Науқастың, әсіресе өмірінің алғашқы айларындағы баланың жағдайына дұрыс әрі объективті бағаны тек дәрігер бере алады.
Ақпарат көзі : https://www.gov.kz/memleket/entities/ksek/press/news/details/1282033?lang=ru
Жауап қалдыру Жауапты болдырмау