Іш сүзегінің алдын алу

Іш сүзегі – бұл Salmonella Typhi бактериясы қоздыратын, өмірге қауіп төндіруі мүмкін, жедел инфекциялық ауру. Ауру ағзаның жалпы интоксикациясымен, қызбамен, асқазан-ішек жолы мен лимфа жүйесінің зақымдануымен сипатталады.

 

Инфекция көзі: Іш сүзегін жұқтыру негізінен фекальды-оральды жолмен ластанған су, тағам өнімдері және лас қол арқылы жүреді. Сондай-ақ инфекция жұқтырғанын білмейтін симптомсыз тасымалдаушылар да жұқтыруы мүмкін.

 

Негізгі белгілері: дене қызуының біртіндеп жоғары деңгейге көтерілуі, айқын әлсіздік, бас ауруы, тәбеттің төмендеуі, жүрек айнуы, іштің ауыруы және кебуі, тілдің жабындымен қапталуы, ауыздың құрғауы, нәжістің бұзылуы (іш өту немесе іш қату). Кейбір жағдайларда аурудың 7–10-күнінде денеде, әсіресе тұлға аймағында, өзіне тән розеолезді бөртпе пайда болады. Аурудың ауыр ағымында ішектен қан кету және ішектің тесілуі сияқты асқынулар болуы мүмкін. Инкубациялық кезең әдетте 6-дан 30 күнге дейін, көбінесе 8–14 күнді құрайды.

 

Алдын алу: іш сүзегі санитариялық жағдайы нашар және қауіпсіз ауыз суы жоқ жерлерде кең таралған. Қауіпсіз суға қолжетімділік және тиісті санитариялық жағдайды қамтамасыз ету, тағам өнімдерімен жұмыс істейтін адамдардың гигиеналық талаптарды сақтауы және іш сүзегіне қарсы вакцинациялау осы аурудың алдын алудың тиімді шаралары болып табылады.

 

Келесі ұсыныстар іш сүзегімен жұқтыру қаупін азайтуға көмектеседі:

 

– жеке бас гигиенасы ережелерін сақтау, дәретханадан кейін және тамақ ішер алдында қолды сабынмен мұқият жуу;

 

– қауіпсіз ауыз суды пайдалану, тексерілмеген көздерден алынған суды ішуден бас тарту;

 

– көкөністер мен жемістерді мұқият жуу, тағам өнімдерін жеткілікті термиялық өңдеу, сондай-ақ оларды дайындау және сақтау ережелерін сақтау;

 

– ауыз судың сапасына санитариялық бақылау жүргізу, кәріз жүйесінің дұрыс жұмыс істеуін қамтамасыз ету және қоғамдық тамақтану объектілерінде санитариялық-гигиеналық талаптарды сақтау маңызды.

 

Ауру белгілері пайда болған жағдайда дер кезінде медициналық көмекке жүгіну қажет. Іш сүзегіне қарсы вакцинациялау жұқтыру қаупі жоғары адамдарға медициналық көрсетілімдер бойынша жүргізіледі.

Ақпарат көзі : https://www.gov.kz/memleket/entities/departament-kkbtu-almaty/press/news/details/1282709?lang=ru