Ақтөбе қаласының жаңартылған теміржол вокзалында дуалды оқыту бағдарламасы аясында оқу-өндірістік тәжірибеден өткен студенттерге еңбек кітапшаларын табыстау рәсімі өтті.
Іс-шараға Ақтөбе облысының әкімі Асхат Шахаров, «Самұрық-Қазына» АҚ Басқарма төрағасы Нұрлан Жақыпов, колледж өкілдері мен жастар қатысты.
Биыл Ақтөбе көлік және коммуникациялар колледжі мен Ақтөбе гуманитарлық-техникалық колледжі ALT-тың бес студенті «Қазақстан темір жолы» компаниясында тәжірибеден өтіп, еңбек кітапшаларын алды. Осылайша, жастар теміржол саласындағы кәсіби жолын бастады.
«Бүгінде Ақтөбе облысында дуалды оқыту 28 колледжде енгізілген. Бұл жастарға теориялық білімін өндірістік тәжірибемен ұштастырып, еңбек нарығына қажетті дағдыларды ерте меңгеруге мүмкіндік береді. Біз кәсіпорындар мен колледждер арасындағы байланысты одан әрі күшейтіп, жастардың кәсіби тұрғыда қалыптасуына жағдай жасай береміз», – деді Асхат Шахаров.
Өңірде дуалды оқытуға 1104 кәсіпорын тартылып, 8694 студент қамтылды. Оқыту 60 мамандық және 87 біліктілік бойынша жүргізіледі. Студенттер көлік, тау-кен, ауыл шаруашылығы, құрылыс, энергетика және басқа да салаларда тәжірибеден өтеді.
Колледждердің негізгі серіктестері қатарында «Қазхром» ТҰК, «Дөң тау-кен байыту комбинаты» АҚ филиалы, «Қазпошта» АҚ, «АМК Жарық» ЖШС, «Анвар» ЖШС және «Данай-Ақтөбе» ЖШС бар.
«Самұрық-Қазына» компаниялар тобында жыл сайын шамамен 10 мың студент дуалды оқыту мен өндірістік практикадан өтеді. Бұл жүйе жастарға оқу кезінде еңбек дағдыларын меңгеріп, кейін жұмысқа орналасуға мүмкіндік береді.
Іс-шара барысында Нұрлан Жақыпов Ақтөбедегі теміржол вокзалын жаңғырту жұмыстарымен де танысты. Вокзалда ғимарат пен инженерлік жүйелер жаңартылып, жолаушылар үшін қолайлы жағдай жасалуда.
«Жұмыстарды белгіленген мерзімде аяқтаумен қатар, олардың сапасы жоғары және қауіпсіз болуын қамтамасыз ету маңызды. Міндет – жолаушылар үшін заманауи әрі қолайлы жағдай жасау», – деді Нұрлан Жақыпов.
Ақпарат көзі : https://www.gov.kz/memleket/entities/aktobe/press/news/details/1283669?lang=ru
Жауап қалдыру Жауапты болдырмау