Музыка, ұлттық тағамдар, ойындар, жәрмеңке және еркін форматта қазақ тілін үйрену — 5 қыркүйекте Қарағандының Орталық саябағында Қазақстан халқы тілдері күніне арналған «Тіл-FEST – 2026» фестивалі өтеді.
Іс-шара сағат 10:00-де басталады. Мерекелік шараға ересектер мен балалар шақырылады. Қатысушылар демалыс күнін қызықты әрі танымды өткізіп, қазақ тілі мен мәдениеті туралы көбірек біле алады. Бағдарламада концерттік шоу, интерактивті алаңдар, ойындар, викториналар және отбасылық байқаулар қарастырылған. Ең белсенді қатысушыларға сыйлықтар мен жүлделер табысталады.
Фестиваль алаңдарының бірі — «Қазақша сөйлейік!» Talk&Play. Мұнда қатысушылар ойындар мен түрлі тапсырмалар арқылы қазақ тілін тәжірибе жүзінде қолдана алады. Сондай-ақ басқа қатысушылармен еркін сөйлесіп, жаңа сөздерді күнделікті өмірдегі қарапайым жағдайларда қолдануға мүмкіндік бар. Барлығы бейресми, оқу барысына тән қалыпты атмосферадан тыс еркін форматта өтеді.
Ұлттық тағамдарды ұнататындар үшін дәстүрлі тағамдар көрмесі ұйымдастырылады. Ал «Qazaq BrandMarket» жәрмеңкесінде отандық тауарлар мен қазақстандық брендтер таныстырылады.
Ақпарат көзі : https://www.gov.kz/memleket/entities/karaganda-shet-ortau/press/news/details/1285155?lang=ru
Жауап қалдыру Жауапты болдырмау