Білім күні «Алтын Орда» шағынауданында жаңа жалпы білім беретін №81 мектептің салтанатты ашылу рәсімі өтті. «Келешек мектептері» ұлттық жобасы аясында салынған заманауи білім ордасы жаңа оқу жылынан бастап 900 оқушыны қабылдайды.
Жаңа оқу жылының басталуымен оқушыларды, ата-аналар мен ұстаздарды білім басқармасының басшысы Бұлбұл Күзембаева құттықтады.
«Құрметті ата-аналар, қадірлі ұстаздар мен оқушылар! Баршаңызды жаңа оқу жылының басталуымен шын жүректен құттықтаймын!
«Келешек мектептері» ұлттық жобасы аясында салынған №81 мектеп биыл 900 оқушыны қабылдайды. Сонымен қатар, биыл өңірде тағы бес мектеп пайдалануға беріледі, екі мектепке қосымша ғимараттар салынып, пайдалануға енгізіледі. Ал сегіз мектепте реновация бағдарламасы аясында жөндеу жұмыстары жүргізілді.
Ақтөбе облысының әкімі Асхат Шахаровтың қолдауымен оқушыларымыздың сапалы білім алуы, жайлы жағдайда оқуы және жан-жақты дамуы үшін барлық қажетті жағдайлар жасалуда.
Құрметті ата-аналар! Сіздер мен балаларыңызды жаңа оқу жылының басталуымен тағы да құттықтаймын! Оқушыларымызға табыс, жаңа білім, жарқын жетістіктер тілеймін. Мектеп жылдары әр бала үшін игі оқиғаларға, қызықты жаңалықтар мен жеңістерге толы болсын.
Білім алудың 11 жылы әр баланың өміріндегі бақытты әрі маңызды кезеңге айналсын. Ал біз, ересектер, олардың жетістіктері мен үлкен жеңістерінің куәсі болайық!»
Жаңа мектеп 900 оқушыға арналған және білім беру инфрақұрылымына қойылатын заманауи талаптарға толық сәйкес келеді. Ғимаратта балалардың толыққанды білім алуына, шығармашылық және спорттық қабілеттерін дамытуына қажетті барлық жағдай жасалған.
Мектепте заманауи оқу кабинеттері мен зертханалар, спорт және акт залдары, шеберханалар, сондай-ақ басқа да мамандандырылған бөлмелер қарастырылған. Білім ордасының заманауи жабдықталуы дәстүрлі сабақтармен қатар, практикалық, зерттеу және жобалық жұмыстарды ұйымдастыруға мүмкіндік береді.
Ақпарат көзі : https://www.gov.kz/memleket/entities/aktobe-bilim/press/news/details/1285543?lang=ru
Жауап қалдыру Жауапты болдырмау