Бүгін, 4 қыркүйекте Ақтау қаласында 2026 жылғы көктемгі әскерге шақыру науқанының қорытындысы және күзгі мерзімді әскери қызметке шақыруға дайындық мәселелері бойынша кеңес өтті.
Маңғыстау облысы әкімінің бірінші орынбасары, облыстық әскерге шақыру комиссиясының төрағасы Асхат Ораловтың төрағалығымен өткен жиынға Қорғаныс істері жөніндегі департаментінің, құқық қорғау және мемлекеттік органдардың өкілдері, сондай-ақ қала мен аудан әкімдіктерінің жауапты мамандары қатысты.
Кеңесте көктемгі әскерге шақыру науқанының қорытындысы қаралып, күзгі науқанды ұйымдастыруға қатысты басым міндеттер айқындалды. Атап айтқанда, медициналық куәландырудан өткізу, заңнама талаптарын сақтау, әскерге шақырылушыларды әскери бөлімдерге уақытылы жеткізу және жөнелту мәселелеріне назар аударылды.
«Мерзімді әскери қызметке шақыру – тәртіпті, нақтылықты және жоғары жауапкершілікті талап ететін маңызды мемлекеттік міндет. Бұл мәселеге формалды көзқарас танытуға жол берілмейді. Қабылданатын шешімдердің объективтілігін, заң талаптары мен әскерге шақырылушылардың заңды құқықтарының қатаң сақталуын қамтамасыз етуіміз қажет. Барлық жауапты органдардың үйлесімді жұмысы қойылған міндеттердің уақытылы әрі сапалы орындалуына тікелей байланысты. Соңғы нәтижеге әр басшы жеке жауапты», – деді Асхат Оралов.
Күзгі әскерге шақыру науқаны аясында Маңғыстау облысынан 809 азаматты мерзімді әскери қызметке жіберу жоспарланып отыр.
Белгіленген жоспарды орындау үшін әскерге шақыру комиссиялары, қорғаныс істері жөніндегі органдар, құқық қорғау органдары мен әкімдіктердің өзара үйлесімді жұмысы қамтамасыз етілуге тиіс. Әскерге шақырылушыларды уақытылы жеткізу, шақырудан жалтарып жүрген азаматтармен жұмыс жүргізу және науқанның барлық кезеңінде заңнама талаптарының сақталуы басты назарда болады.
Кеңес қорытындысы бойынша күзгі әскерге шақыруды ұйымдастыруға қатысты нақты міндеттер белгіленді. Науқанның барысы, белгіленген жоспардың орындалуы және заңнама талаптарының сақталуы облыстық әскерге шақыру комиссиясының тұрақты бақылауына алынды.
Маңғыстау облысы әкімінің баспасөз қызметі
Ақпарат көзі : https://www.gov.kz/memleket/entities/akimat-goroda-aktau/press/news/details/1286202?lang=ru
Жауап қалдыру Жауапты болдырмау