Ұлытау облысы Төтенше жағдайлар департаментінің Өнеркәсіптік қауіпсіздік басқармасы мұнаралы крандарды қауіпсіз пайдалану талаптарының сақталуына қатысты жұмыс кеңесін өткізді.
Аталған іс-шараға жүк көтергіш құрылғыларды пайдаланатын құрылыс ұйымдарының, атап айтқанда «ASI Invest Group», «Жетісу-Сарыарқа» және «Самға» ЖШС өкілдері қатысты.
Кеңес барысында Қазақстан Республикасы Төтенше жағдайлар министрлігі Өнеркәсіптік қауіпсіздік комитетінің 2026 жылдың шілде-тамыз айларында Астана қаласының аумағында орын алған мұнаралы крандардың құлау оқиғалары туралы ресми ақпараты тыңдалды. Сонымен қатар өңір аумағында жүргізілген жоспардан тыс тексеру нәтижелері жан-жақты талдаудан өтті.
Жиынға қатысушылар бақылау-қадағалау шаралары барысында анықталған бұзушылықтарды жою жолдарын, жүк көтергіш механизмдердің техникалық жай-күйіне тексеру жүргізу және оларды уәкілетті органда есепке қоюдың белгіленген тәртібін қарастырды.
Кеңес қорытындысы бойынша мұнаралы крандарды пайдалану кезінде ықтимал апаттардың, оқиғалардың және өндірістік жарақаттанудың алдын алуға, сондай-ақ өнеркәсіптік қауіпсіздік деңгейін арттыруға бағытталған қосымша ұйымдастырушылық-техникалық шаралар белгіленді.
Ақпарат көзі : https://www.gov.kz/memleket/entities/kpb/press/news/details/1286225?lang=ru
Жауап қалдыру Жауапты болдырмау