Павлодарда алғаш рет ауқымды LowKzMeet автофестивалі өтті. «Ertis» ипподромының жаңа алаңы бір күн бойы автокөлік әуесқойларының, спортшылардың, жастардың және балалы отбасылардың басын қосқан орталыққа айналды.
Іс-шара Павлодар қаласы әкімдігінің қолдауымен ұйымдастырылды. Автофестивальге Павлодар облысының әкімі Асайын Байханов қатысты. Ол көрермендер назарына ұсынылған автокөлік жобаларымен танысып, қатысушылармен және қонақтармен жүздесті, сондай-ақ кәсіби пилоттардың өнер көрсетуін тамашалады.
Фестивальдің басты ерекшелігі – автокөліктер болды. Павлодарға Қазақстанның түрлі қалаларынан 150-ден астам қатысушы келді. Бір алаңда сирек кездесетін автокөлік үлгілері, ерекше тюнинг-жобалар, қуатты спорттық көліктер және автокөлік мәдениетінің әуесқойлары жасаған көліктер таныстырылды.
Қонақтардың ерекше назарын экшн-аймақ аударды. Кәсіби пилоттар көпшілікке әсерлі өнер көрсетіп, автокөлікті басқару техникасы мен шеберліктерін паш етті. Ал адреналинді жеке сезінгісі келгендер дрифт-такси қызметін пайдалана алды.
Сонымен қатар LowKzMeet фестивалі тек автокөлік шарасымен шектелген жоқ. Келушілер үшін стритбол және PlayStation платформасындағы EA Sports FC бойынша турнирлер, балалар алаңдары, тамақтану орындары, түрлі байқаулар мен серіктестердің интерактивті ойындары ұйымдастырылды.
«Ertis» алаңы қонақтарды таңертеңнен кешке дейін қабылдап, фестиваль ауқымды концертпен қорытындыланды. Көрермендер алдында Omerta бірлестігінің өкілдері Niman, Truwer, Экси және Captown өнер көрсетті.
Фестиваль соңында үздік автокөлік жобалары мен ең әсерлі өнер көрсетулер анықталды. Жеңімпаздарға арнайы жүлделер табысталды. Үздіктер келушілер арасында өткізілген онлайн дауыс беру арқылы анықталды.
Павлодарда алғаш рет өткен LowKzMeet автокөлік мәдениетінің спорт, музыка, шығармашылық және отбасылық демалыс сияқты түрлі қызығушылықтарды біріктіре алатынын көрсетті. Фестиваль күздің алғашқы айларындағы ең жарқын шаралардың біріне айналып, жаңа «Ertis» ипподромының ірі қалалық іс-шараларды өткізуге арналған заманауи алаң ретіндегі мүмкіндігін танытты.
Павлодар облысы әкімінің баспасөз қызметі
Суреттерді түсірген Валерий Бугаев
Ақпарат көзі : https://www.gov.kz/memleket/entities/pavlodar/press/news/details/1287541?lang=ru
Жауап қалдыру Жауапты болдырмау