«ТӘЖІРИБЕДЕН — БОЛАШАҚҚА»

«ТӘЖІРИБЕДЕН – БОЛАШАҚҚА»

Кәсіби жол әрдайым ондаған жылдармен өлшенбейді. Кейде басты көрсеткіш — кәсіби дамудың қарқыны, жауапкершілікті өз мойнына алуға дайын болу және жаңа бағыттарды сенімді меңгеру қабілеті. Жұмашева Айгерім Қанатқызының еңбек жолы — кәсіби білім, бастамашылдық және жаңа сын-қатерлерді қабылдауға дайын болу адамның алға нық қадам басуына мүмкіндік беретінінің айқын мысалы.

Айгерім Қанатқызы 1994 жылғы 21 наурызда Павлодар қаласында дүниеге келген. 2017 жылы «Медициналық-профилактикалық іс» мамандығы бойынша «Астана медицина университеті» АҚ-нын тәмамдап, санитариялық-эпидемиологиялық бақылау саласында еңбек етуге қажетті кәсіби негіз қалыптастырды. Кәсіби құзыреттерін кеңейтуге деген ұмтылысы кейінгі білім алуынан да көрініс тапты: 2020 жылы Инновациялық Еуразия университетін заң мамандығы бойынша бітірді.

Айгерім Қанатқызы өзінің кәсіби қызметін 2017 жылғы қыркүйекте Павлодар облысының қоғамдық денсаулық сақтау жүйесінде эпидемиологиялық қадағалау бөлімінің жетекші маманы қызметінен бастады. Ал 2018 жылдың соңында бас маман лауазымына тағайындалды.

Кәсіби қызметінің алғашқы жылдары ол үшін қарқынды даму және практикалық құзыреттерді қалыптастыру кезеңі болды. Эпидемиологиялық қадағалау, тауарлар мен көрсетілетін қызметтердің сапасы мен қауіпсіздігін бақылау, медициналық қызметтердің сапасына мониторинг жүргізу, техникалық регламенттер талаптарының сақталуын қамтамасыз ету — әрбір жаңа бағыт оның кәсіби білім аясын кеңейтіп, мемлекеттік санитариялық-эпидемиологиялық бақылаудың ерекшеліктерін тереңірек түсінуге мүмкіндік берді.

Уақыт өте келе Айгерім Қанатқызының кәсіби қызмет бағыты да жаңа деңгейге көтерілді. Ол инфекциялық емес аурулар мәселелерімен және коммуналдық мақсаттағы объектілермен жұмыс істеуден бастап, өнеркәсіптік және радиациялық қауіпті объектілерге, азаматтық қорғаныс пен төтенше жағдайларға қатысты бағытты басқаруға дейінгі кәсіби жолдан өтті.

2021 жылғы желтоқсаннан бастап ол Павлодар облысының санитариялық-эпидемиологиялық бақылау департаментінің өнеркәсіптік және радиациялық қауіпті объектілерді бақылау және қадағалау бөлімін басқарды.

Бұл бағыттағы жұмыс ерекше дәлдікті, жоғары кәсіби біліктілікті және үлкен жауапкершілікті талап етеді. Өнеркәсіптік және радиациялық қауіпті объектілерге санитариялық-эпидемиологиялық бақылау жүргізудің артында адамдардың қауіпсіздігі, ықтимал тәуекелдердің алдын алу және халықтың санитариялық-эпидемиологиялық саламаттылығын қамтамасыз ету мәселелері тұр.

Мемлекеттік қызметтегі тоғыз жылға жетпейтін уақыт ішінде Айгерім Қанатқызы қызметін енді бастаған маманнан бейінді бөлімшенің басшысына дейінгі кәсіби жолдан өтті. Мұндай кәсіби өсу тек алған білімі мен практикалық тәжірибесінің нәтижесі ғана емес, сонымен қатар жаңа бағыттарды тез меңгеру, салмақты шешімдер қабылдау және олардың орындалуына жауапкершілікпен қарау қабілетінің жемісі болды.

2023 жылы оның кәсіби еңбегі Қазақстан Республикасының Бас мемлекеттік санитариялық дәрігерінің Құрмет грамотасымен атап өтілді.

Бүгінде Айгерім Қанатқызы кәсіби біліктілік, принципшілдік және егжей-тегжейге мұқият қарау ерекше маңызға ие салада еңбек ете отырып, саламен бірге дамуын жалғастыруда. Оның еңбек жолы кәсіби өсудің ең алдымен үздіксіз білім алуға, жаңа сын-қатерлерді қабылдауға және алған білімді нақты нәтижеге айналдыруға дайын болудан тұратынын көрсетеді.

Заманауи санитариялық-эпидемиологиялық қызмет дәл осындай мамандардан қалыптасады — білікті, бастамашыл әрі жауапты кәсіби мамандардан. Олар шешім қабылдауға және оның нәтижесіне жауап беруге дайын, өйткені әрбір жұмыс бағытының артында ең басты құндылық — адамдардың қауіпсіздігі мен денсаулығы тұрғанын жақсы түсінеді.

Ақпарат көзі : https://www.gov.kz/memleket/entities/departament-kkbtu-pavlodar/press/news/details/1291517?lang=ru