Таксистің барсеткасынан 103 қорап темекіге дейін: Қарағандыда бірқатар ұрлыққа қатысы бар күдікті ұсталды. Тамыз айының соңында такси жүргізушісінің көлігінің артқы орындығынан күміс әшекей бұйымдары салынған барсетка ұрланған. Күдік жәбірленуші қонақүй маңында түсіріп кеткен жолаушыға түскен. Әйел полицияға хабар беріп, оқиға орнында қалған. Оқиға орнына келген патрульдік полиция қызметкерлері мән-жайды анықтау барысында екі жайтқа назар аударған. Біріншісі – жолаушы мінген мекенжай, екіншісі – оның қолындағы темекіге толы пакет. Белгілі болғандай, осыдан бір сағат бұрын дәл осы мекенжайдан орналасқан дүкеннен темекі мен ақша ұрланғаны туралы полицияға хабарлама түскен. Полиция бөліміне жеткізілген күдіктіден ұрланған барсетка ішіндегі заттарымен бірге, 103 қорап темекі және дүкен кассасынан алынған 125 мың теңге тәркіленді. Тергеу барысында 32 жастағы ер адамның қаланың басқа бөлігінде орналасқан автокөлік жуу орнынан да ұрлық жасағаны анықталды. Аталған нысанның кассасынан 1,3 млн теңге ұрланған. Күдікті қылмыс жасаудың ұқсас тәсілін қолданған. Ол кассаға немесе өзге де материалдық құндылықтарға қол жеткізуге болатын орындарды таңдап, қызметкерлердің сақтық танытпауын пайдаланған. Бір жағдайда тіпті таксидегі ұсақ заттарды да ұрлаған. Кейіннен дәл осы ұрлық оның басқа қылмыстарға қатысын анықтауға мүмкіндік берген маңызды дерекке айналды. Қазіргі уақытта қозғалған қылмыстық іс аясында күдіктінің осыған ұқсас басқа да қылмыстарға қатысы бар-жоғы тексеріліп жатыр.
Ақпарат көзі : https://www.gov.kz/memleket/entities/mvd-karaganda/press/news/details/1291339?lang=ru
Жауап қалдыру Жауапты болдырмау