Спасск тасжолында облыстық полиция департаментінің криминалдық және табиғатты қорғау полициясы Қарағанды қаласы патрульдік полиция полкінің қызметкерлерімен бірлесіп, 39 жастағы ер адам басқарған автокөлікті тоқтатты.
Көлікті тексеру барысында екі атыс қаруы, бір пневматикалық мылтық, тегіс ұңғылы қаруға арналған 27 патрон, пневматикалық қаруға арналған оқтары бар екі құты және жабайы жануардың еті салынған бірнеше құрылыс қаптары табылды.
Алдын ала мәлімет бойынша, ет Қазақстанның Қызыл кітабына енгізілген арқарға тиесілі болуы мүмкін. Бұл дерек сараптама арқылы нақтыланады.
Тексеру кезінде пневматикалық мылтыққа құқық белгілейтін құжаттардың жоқтығы және аң аулауға рұқсат берілмегені анықталды. Қалған қарулар 42 жастағы жолаушының атына тіркелген.
Аталған факт бойынша қылмыстық іс қозғалып, қажетті сараптамалар тағайындалды. Заттай дәлелдемелер тәркіленді. Сарапшылар жануардың нақты түрі мен еттің шығу тегін анықтайды. Оқиғаның барлық мән-жайы анықталуда.
Полиция қызметкерлері аң аулау және қару айналымы заңнама талаптарымен қатаң реттелетінін еске салады. Қызыл кітапқа енгізілген сирек кездесетін жануарларды заңсыз аулау үшін заңнамада қылмыстық жауапкершілік көзделген.
Қарағанды облысында табиғатты қорғау бағытындағы рейдтік іс-шаралар тұрақты түрде жүргізіледі. Полиция азаматтарды аң аулау кезінде заң талаптарын сақтап, тиісті рұқсат құжаттарынсыз қару қолданбауға шақырады.
Ақпарат көзі : https://www.gov.kz/memleket/entities/qriim/press/news/details/1292153?lang=ru
Жауап қалдыру Жауапты болдырмау