Астанада Орталық Азия мен Еуропаның декарбонизация мәселелері жөніндегі үшінші өңірлік форум өтті. Форум жыл сайынғы саяси және салалық іс-шаралар сериясын жалғастырды. Іс-шараның тең ұйымдастырушылары – Қазақстан Республикасының Энергетика министрлігі және «H2-diplo – Декарбонизация дипломатиясы» жобасы аясындағы Астанадағы GIZ-дің Сутегі дипломатиясы кеңсесі (H2 diplo).
Форумда Энергетика вице-министрі Санжар Жаркешов құттықтау сөз сөйлеп, жаңартылатын энергия көздерін дамыту, декарбонизация, электр желілерін жаңғырту, энергетикалық қауіпсіздікті қамтамасыз ету және өңірлік интеграция тұрақты дамудың өзара байланысты бағыттарына айналып отырғанын атап өтті.
Бүгінде Қазақстанда жалпы белгіленген қуаты шамамен *3,8 ГВт болатын 170 жаңартылатын энергия көздері нысаны* жұмыс істейді. 2030 жылға қарай ЖЭК үлесін 15%-ға, ал 2050 жылға қарай баламалы және төмен көміртекті энергетиканың үлесін 50%-ға жеткізу мақсатында жыл сайын аукциондар өткізу және стратегиялық инвесторлармен ірі жобаларды іске асыру жалғасады. Электр энергетикасын 2035 жылға дейін дамыту жоспарына сәйкес, кемінде *8,4 ГВт ЖЭК қуатын* іске қосу көзделген.
Электр желілерін дамытуға, энергия сақтау жүйелеріне, энергожүйенің теңгерімділігі мен икемділігін арттыруға, сондай-ақ өңірлік ынтымақтастық пен электр энергиясының трансшекаралық саудасына ерекше назар аударылды.
Сутегі энергетикасын дамыту перспективалы бағыттардың бірі ретінде атап өтілді. Қазақстан төмен көміртекті сутегінің әлеуетін, оны өнеркәсіпте қолдану мүмкіндіктерін және қысқартылуы қиын шығарындыларды декарбонизациялау жолдарын зерделеп жатыр.
Сондай-ақ форум барысында энергия сақтау, энергожүйелерді басқару, генерацияны болжау, электр желілері және сутегі энергетикасы салаларындағы технологияларды қоса алғанда, ғылыми-технологиялық базаны дамыту қажеттігі атап өтілді.
Ақпарат көзі : https://www.gov.kz/memleket/entities/energo/press/news/details/1292703?lang=ru
Жауап қалдыру Жауапты болдырмау